ရုပ်ရှင်ဧကရာဇ်၏ သေလမ်းရှာ စေ့စပ်ထားသူလေး [ ဘာသာပြန် ] || Completed ||

Chapter 74

Unicode

ယန်းချင်းချီတစ်ယောက် အမိန့်ပြန်တမ်းအတုလုပ်ပြီး ဝေ့လန်ကိုနှိုးနေတယ်၊ ယွမ်မင်ရွှိကတော့ အကူအညီမပါပဲနဲ့ကို မအောင်မြင်နိုင်တာ
__________________________________

မနက် ၁နာရီခွဲတွင် ကင်မရာမန်းတစ်ယောက်စီ ကင်မရာကြီးတွေကိုင်ပြီး သရုပ်ဆောင်တွေရဲ့အခန်းထဲကို တိတ်တိတ်လေးခိုးဝင်လာကြသည်။ သူတို့က သရုပ်ဆောင်တွေကို လိုက်နှိုးနေရင်း ဖြစ်သွားသည့် အိပ်မှုံစုတ်ဖွားရုပ်များကို အပီအပြင် ရိုက်ယူကြတော့သည်။

ယန်းချင်းချီနဲ့ ချန်ရွှမ်းလန်ကတော့ အသင့်ပြင်ဆင်ထားတာကြောင့် ကင်မရာမန်း သူတို့အခန်းထဲဝင်လာသည့်အခါ ရုပ်ဆိုးဆိုးပုံတွေမရလိုက်ပဲ သဘာဝကျကျပဲ နိုးလာကြသည်။

သို့သော် ဝေ့လန်ဘက်မှာတော့ အခြေအနေသိပ်မကောင်းပေ။ ဝေ့လန်က သူအိပ်နေတုန်း အနှိုးခံလိုက်ရလျှင် အရမ်းကိုစိတ်ဆတ်လွယ်သည်။ အထူးသဖြင့် အိပ်ပျော်သွားတာသိပ်မကြာသေးခင် တစ်ယောက်ယောက်က သူ့ကိုလာနှိုးချိန်မျိုးဖြစ်သည်။ ကင်မရာမန်းရော စွင်းရွှင်ပါဒုက္ခတွေရောက်နေကာ ဝေ့လန်က မကြာခင်ပေါက်ကွဲထွက်တော့မည့် ချိန်ကိုက်ဗုံးတစ်လုံးလိုပင်။

''အခုချက်ချင်း အကုန်လုံးထွက်သွား! ''

ဝေ့လန် ထိုသို့အော်ကာ ပြန်ဆက်အိပ်နေသည်။ တစ်ခန်းထဲအတူတူနေ,နေရသည့် စွင်းရွှင်တစ်ယောက် တဖက်လူအော်သံကြီးကြောင့် ခြေမကိုင်မိလက်မကိုင်မိဖြစ်နေတော့သည်။

ကင်မရာမန်းလည်း ကင်မရာကြီးကိုင်ကာ ဆက်မနှိုးရဲတော့ပေ။ စွင်းရွှင်ကိုအကူအညီတောင်းသလိုလေး လှမ်းကြည့်နေသည်။ သို့သော် စွင်းရွှင်ကိုယ်တိုင်ကလည်း မနှိုးရဲပါ။

''ငါ့ကိုလာကြည့်မနေနဲ့ ငါလည်းမနှိုးရဲဘူး ''

နှစ်ယောက်သား ဘာလုပ်လို့ဘာကိုင်ရမှန်းမသိဖြစ်နေချိန် ယန်းချင်းချီ တံခါးခေါက်လိုက်ကာ စေ့ထားသည့်တံခါးလေးကို တွန်းဖွင့်ပြီး အထဲဝင်လာသည်။

စွင်းရွှင် ယန်းချင်းချီဝင်လာတာကိုမြင်တော့ အံ့သြသွားသည်။