ငရဲမှလာသောသူ [ Chapter 201 to 400]

Chapter 399

ငရဲမှလာသောသူ
The Man from Hell
Author Autumn Wind 123
ဘာသာပြန် Han Shin

စာစဉ် 27 CHAPTER (399) ကူးလန်ဂြိုဟ်၏ အနာဂတ် ဂြိုဟ်ခေါင်းဆောင်

“အား…အား…အား…”
အခန်းထဲတွင် ငယ်သံပါအောင် အော်ဟစ်နေသံများဖြင့် ပြည့်နှက်လို့နေသည်။ ထိုသို့သော အချိန်၌ ကူးရှုံး၊ ကူးမိန်နှင့် ကူးထျန်းတို့ လုံးဝကို မှင်တက်လို့နေသည်။
ကူးလန်ဂြိုဟ်၏ နံပါတ်တစ် နတ်ဘုရား ဆရာသခင်အဆင့် ပါရမီရှင်က အမှိုက်ထုပ်ကဲ့သို့ တစ်စစီ ဆွဲဖြုတ်ခံနေရသည်။
*ဒါ … လုံးဝ မဖြစ်နိုင်ဘူးလေ*
ယခုအချိန်တွင် အခြားသူများအားလုံး သရဲသဘက်ကို မြင်လိုက်ရသကဲ့သို့ မျက်ခုံးတလှုပ်လှုပ် ဖြစ်လာကြသည်။
ကူးယန် ရူးမတတ် ဖြစ်လို့နေ၏။ လက်ဖဝါး၊ လက်ဖျံ၊ ပခုံး …
သူ၏ ခန္ဓာကိုယ် အစိတ်အပိုင်းများသည် ယဲ့ဖန်ကြောင့် တစ်ခုပြီးတစ်ခု ဆွဲဖြုတ်ခံနေရသည်။ ချင်းချင်းနီနေသော သွေးများက ကြမ်းပြင်ပေါ် ဖုံးလွှမ်းလို့နေ၏။
သူသည် တစစ်စစ်နှင့် ကိုက်ခဲနေသော နာကျင်မှုကြောင့် တုန်လှုပ်နေသည်။
*လူထူးလူဆန်းပဲ*
ကူးယန်၏ မျက်လုံးထဲတွင် ယဲ့ဖန်သည် ရက်စက်သော လူထူးလူဆန်းတစ်ယောက် ဖြစ်သည်။
“မလုပ်နဲ့”
ဂျွတ်ခနဲ အသံနှင့်အတူ ကူးယန်၏ ခြေထောက်တစ်ဘက်သည် ယဲ့ဖန်ကြောင့် ပြုတ်ထွက်သွားလေ၏။
နာကျင်မှုကြောင့် သူ၏ နဖူးတွင် ချွေးများစို့လို့နေသည်။ ကြောက်နေသည်။
ကူးယန်အတွက် မွေးဖွားပြီးချိန်မှစ၍ ပထမဆုံးအကြိမ်အဖြစ် စိတ်ဓာတ်ကျသလို ခံစားနေရသည်။ သူသည် ကျားခံတွင်းဝသို့ သက်ဆင်းနေရသော သိုးပေါက်ကဲ့သို့ အားနည်းလို့နေသည်။
“ရပ်လိုက်၊ မြန်မြန် ရပ်လိုက်တော့”
ကူးယန်သည် ယဲ့ဖန်က သူ၏ ကျန်ခြေထောက်တစ်ဘက်ကို ဆွဲဖြုတ်တော့မည်ကို သတိပြုမိပြီး အသည်းအသန် အော်ဟစ်လေတော့သည်။
“မင်း ငါ့ကို သတ်လို့မရဘူးကွ။ ငါက ကူးလန်ဂြိုဟ်ရဲ့ အနာဂတ် ဂြိုဟ်ခေါင်းဆောင် ဖြစ်လာမယ့်သူရဲ့ တူတော်ကွ။ မင်း ငါ့ကို သတ်ရင် ငါ့ဦးလေးက မင်းကို ဘယ်တော့မှ ခွင့်လွှတ်မှာ မဟုတ်ဘူး”
*ကူးလန်ဂြိုဟ်ရဲ့ အနာဂတ် ဂြိုဟ်ခေါင်းဆောင်*
သူ့စကားကို ကြားပြီး ယဲ့ဖန်က သူ့လက်ဝါးကို ချက်ချင်း ရပ်လိုက်သည်။ ကူးရှုံးနှင့် ကူးမိန်တို့သည်လည်း အလွန် ထိတ်လန့်သွားကြသည်။
*သူက …. ဟိုလူကို ပြောချင်နေတာများလား*
ကူးရှုံးနှင့် ကူးမိန်တို့သည် ထိုသူက ဟဲလန်၏ သေဆုံးမှုနောက်ပိုင်းတွင် ကူးလန်ဂြိုဟ်၏ ထိပ်သီး ပုဂ္ဂိုလ်ဖြစ်လာသည်ကို သိထားကြသည်။ ကူးလန်ဂြိုဟ်၏ အင်အားစုများစွာက ထိုသူ ဂြိုဟ်ခေါင်းဆောင် နေရာကို ဆက်ခံခြင်းနှင့် ပတ်သက်၍ ထောက်ခံကြပြီး သူတို့၏ ရပ်တည်ချက်ကို ဖော်ပြကြသည်။
သို့သော် ယခုအချိန်တွင် ….
“သေစမ်း၊ ကူးယန်က ဒီလောက် မောက်မောက်မာမာနဲ့ ပြုမူနေတာ အံ့ဩစရာ မရှိတော့ဘူး။ နတ်ဘုရား သေနာပတိအဆင့်တွေတောင်မှ သူ့ကို အာမခံရဲကြတာ။ လက်စသတ်တော့ သူက တကယ့် ပုဂ္ဂိုလ်ကြီးရဲ့ တူကိုး”
ကူးရှုံးနှင့် ကူးမိန်တို့သည် အလွန် ထိတ်လန့်သွားကြပြီး သူတို့၏ မျက်နှာများ ပြာနှမ်းလို့နေသည်။
ယဲ့ဖန်က သူ့လက်ဝါးအား ရပ်တန့်လိုက်သည်ကို သတိပြုမိပြီး ကူးထျန်းသည် နောက်ဆုံးတော့ သူ ယဲ့ဖန်ကို ကြောက်လန့်အောင် လုပ်သွားနိုင်ပြီဟု ယုံကြည်သွားသည်။ ထို့နောက် သူက ထီမထင်သော လှောင်ပြုံးမျိုးနှင့် ပြောလိုက်သည်။
“ဟေ့ကောင် သခင်လေး ကူးယန်ကို မြန်မြန် လွှတ်လိုက်စမ်း။ အဲ့ပုဂ္ဂိုလ်ကြီးက ဉာဏ်များလွန်းတယ်။ သူက နတ်ဘုရား အရှင်သခင်အဆင့်အောက်မှာဆို နံပါတ်တစ် သိုင်းပညာရှင်ပဲ။ မင်း မသေချင်ရင် ဒီနေရာကနေ အခု မြန်မြန်ထွက်သွားလိုက်”
ကူးထျန်း၏ အသံက အောင်နိုင်သူ၏ အသံကဲ့သို့ ဖြစ်နေသည်။
ကူးရှုံးနှင့် ကူးမိန်တို့သည်လည်း ကူးထျန်း၏ စကားကြောင့် အလွန်ထိတ်လန့်သွားကာ မျက်နှာများက ဖြူဖတ်ဖြူရော် ဖြစ်နေကြသည်။
သူတို့ ယဲ့ဖန်အား အသည်းအသန် သတိပေးလိုက်ကြသည်။
“အစ်ကိုယဲ့၊ ကျွန်တော်တို့ ပြေးတာပိုကောင်းမယ်ထင်တယ်။ ဂြိုဟ်ခေါင်းဆောင်အိုကြီး သေဆုံးပြီးတဲ့နောက် အဲ့ပုဂ္ဂိုလ်ကြီးက ကူးလန်ဂြိုဟ်ကနေပြီးတော့ ထောက်ခံသူ အများအပြား ရခဲ့တာပါ။ သူက သူ့လူတွေနဲ့အတူ လက်တုံ့ပြန်မယ်ဆိုရင် ကျွန်တော်တို့ သေသွားလိမ့်မယ်”
“ဟုတ်တယ်၊ အစ်ကိုယဲ့။ အဲ့လူက ရန်စလို့ မရနိုင်ဘူး”
ကူးရှုံးနှင့် ကူးမိန်တို့နှစ်ယောက်လုံး ကြောက်စိတ်မွှန်နေကြသည်။
ထိုသူသည် ကူးလန်ဂြိုဟ်အနှံ့တွင် အလွန်နာမည်ကျော်ကြားသည်။ သူသည် တစ်ချိန်တစ်ခါတုန်းက နတ်ဘုရား သေနာပတိအဆင့် ရှိသော ကြေးစား ဓားပြအဖွဲ့ အယောက်နှစ်ဆယ်ကို သုတ်သင်ခဲ့ဖူးသည်။
သူ၏ တိုက်ပွဲဝင်ခွန်အားသည် ကူးလန်ဂြိုဟ်ပေါ်မှ နတ်ဘုရား ဆရာသခင်အဆင့်အားလုံးကြားတွင် အဆင့်တစ် ဖြစ်သည်။ သူသည် ပြိုင်ဘက်ကင်း နတ်ဘုရား သေနာပတိဟု လူသိများသည်။
သူသည် ကူးကလန်ဂြိုဟ်ပေါ်မှ မကောင်းဆိုးဝါးများကို တစ်ယောက်တည်း သတ်ဖြတ်ခဲ့ဖူးပြီး နတ်ဘုရား လူသားများကိုသာ အသက်ရှင်လျက် ထားခဲ့ဖူး၏။
ထို့နောက် သူသည် ဂြိုဟ်ခေါင်းဆောင်၏ အိမ်တော်၌ အစောင့်များ၏ ကပ္ပတိန်အဖြစ် ခန့်အပ်ခြင်း ခံခဲ့ရပြီး အစုလိုက် အပြုံလိုက် သုတ်သင်မှုကြီးမှ တစ်ဦးတည်းသော အသက်ရှင် ကျန်ရစ်သူလည်း ဖြစ်သည်။
ယဲ့ဖန်က အနည်းငယ် ချီတုံချတုံ ဖြစ်နေသည်ကို သတိပြုမိပြီး သွေးများဖြင့် ပေကျံနေသော ကူးယန်သည် သူ၏ မျှော်လင့်ချက်ကို ဆုပ်ကိုင်မိသလို ဖြစ်သွားသည်။
ထို့ကြောင့် သူက ထပ်၍ ခြောက်လှန့်ကာ ပြောလိုက်သည်။
“ဟေ့ကောင် မင်း ဂြိုဟ်ခေါင်းဆောင်ရဲ့ အိမ်တော်က သူတွေနဲ့ ဟဲလန်ကို သတ်လိုက်တာ ဘယ်သူလဲ သိလား”
“နားထောင်၊ ဂြိုဟ်ခေါင်းဆောင်ရဲ့ အိမ်တော်က သူတွေအားလုံးကို သတ်လိုက်တဲ့ အဲ့ကြောက်စရာကောင်းတဲ့သူက ငါ့ရဲ့ ကျောထောက်နောက်ခံပဲ။ မင်း မသေချင်ဘူးဆိုရင် အခု ငါ့ကို လွှတ်လိုက်”
*ဘာ*
သူ့စကားကြောင့် ကူးရှုံးနှင့် ကူးမိန်တို့နှစ်ယောက်လုံး လိပ်ပြာလွင့်မတတ် ကြောက်လန့် သွားကြပြန်သည်။
….
ထူးဆန်းသည်က ကူးယန်၏ စကားကို ကြားပြီးနောက် ယဲ့ဖန်သည် ကြောက်လန့်နေပုံ မပေါ်ပေ။ သူက အနည်းငယ် ချီတုံချတုံ ဖြစ်နေပုံပေါ်သာ ပေါ်သည်။
ထိုစဉ် သူတို့ ကျယ်လောင်လှသော ခြေသံများကို ကြားလိုက်ရသည်။ ထို့နောက် ကြောက်မက်ဖွယ်ကောင်းသော ချီဓာတ်များနှင့် လူများ အခန်းထဲ ဝင်လာကြသည်။
ဆယ်ယောက်၊ အယောက်နှစ်ဆယ်၊ အယောက်သုံးဆယ်။
…..
အချိန်တိုလေးအတွင်းမှာပင် လူအယောက် ငါးဆယ်ကျော် အခန်းထဲ ဝင်လာကြသည်။
နတ်ဘုရား သေနာပတိအဆင့်များပါလား။
ထိုအဖွဲ့သည် နတ်ဘုရား သေနာပတိအဆင့်များနှင့် ပြည့်နေသည်။ ထိုအဖွဲ့ကို ကြည့်ပြီး ကူးရှုံး၊ ကူးမိန်၊ ကူးယန်နှင့် ကူးထျန်းတို့ မျက်ခုံးလှုပ်လာကြသည်။
ကူးလန်ဂြိုဟ် အနှံ့အပြားမှ နတ်ဘုရား သေနာပတိအဆင့်များ အားလုံးနီးပါး ရောက်ရှိလို့နေသည်။
*မယုံနိုင်စရာ ကောင်းလိုက်တာ*
တစ်ခဏကြာသော် နတ်ဘုရား သေနာပတိအဆင့် လူငါးဆယ်တို့သည် နှစ်ဘက်ခွဲ၍ လူတစ်ယောက်အတွက် လမ်းကြောင်းလုပ်ပေးလာကြသည်။
ထိုသူကို မြင်သည်နှင့် ကူးယန် ချက်ချင်း နားဝေတိမ်တောင် ဖြစ်သွားသည်။ ထို့နောက် သူ ကျယ်လောင်စွာ အော်ခေါ်လိုက်သည်။
“ဦးလေး”
*ဘာ*
သူ့စကားကြောင့် ကူးရှုံးနှင့် ကူးမိန်တို့ မိုးကြိုးပစ်ချခံလိုက်ရသလို ခံစားလိုက်ရသည်။
*ဦးလေးတဲ့လား*
“အဲ့လူက … ကူးဖုန်းပါလား*
*ငါတို့တော့ သေပြီပဲ*
ကူးရှုံးနှင့် ကူးမိန်တို့နှစ်ယောက်လုံး ကြောက်ရွံ့ကာ မျက်နှာများ ပြာနှမ်းလာကြသည်။ သူတို့ လွတ်ရန်လမ်းစ မရှိတော့မှန်း သိလိုက်သည်။
ထို့နောက် သူတို့က ယဲ့ဖန်အား ထိတ်ထိတ်ပျာပျာဖြင့် အော်ပြောလိုက်သည်။
“အစ်ကိုယဲ့ ပြေးတော့။ ကျွန်တော်တို့ နှစ်ယောက်နဲ့ ခင်ဗျားရဲ့ လက်အောက်ငယ်သား ရှစ်ယောက်တို့က သူတို့ကို တားထားလိုက်မယ်။ အခု ဒီက ထွက်ပြေးတော့”
“အစ်ကိုယဲ့၊ မြန်မြန်လုပ်ပါ။ မဟုတ်ရင် အရမ်း နောက်ကျသွားလိမ့်မယ်”
ကူးရှုံးနှင့် ကူးမိန်တို့က သူတို့၏ ခင်မင်မှုကို အလွန် တန်ဖိုးထားသည်။ ယဲ့ဖန် အသက်ရှင်နိုင်မည်ဆိုပါက သူတို့သည် သူတို့၏ အသက်ကို စွန့်၍ သူ့အား ကူညီမည် ဖြစ်မည်။
သူတို့၏ အပြုအမူကို ကြည့်ပြီး ယဲ့ဖန်စိတ်ထဲ နွေးထွေးသလို ခံစားလိုက်ရသည်။ ထို့နောက် သူက သူတို့နှစ်ယောက်၏ ပခုံးကို ပုတ်၍ ပြုံးကာ နှစ်သိမ့်လိုက်သည်။
“စိတ်မပူပါနဲ့။ ငါတို့ အဆင်ပြေသွားမှာပါ”
*ငါတို့ အဆင်ပြေသွားမှာတဲ့လား*
ယဲ့ဖန်၏ စကားကြောင့် ကူးရှုံးနှင့် ကူးမိန်တို့နှစ်ယောက်လုံး အပြုံးကြီးပြုံးလိုက်မိသည်။
နတ်ဘုရား သေနာပတိအဆင့် အယောက် ငါးဆယ်ကျော်နှင့် ပြိုင်ဘက်ကင်း နတ်ဘုရား သေနာပတိအဆင့် တစ်ယောက်နှင့် ရင်ဆိုင်နေရတာတောင်မှ ယဲ့ဖန်က အဘယ်ကြောင့် ယုံကြည်မှု ရှိနေသေးတာလဲဆိုတာကို သူတို့ သိချင်မိသည်။
“ဦးလေး၊ မြန်မြန်၊ သူ့ကို သတ်ဖို့ ကျွန်တော့်ကို ကူညီပါဦး။ ဒီမျိုးမစစ်ကောင်က ကူးထို့ကို သတ်ပြီး ကျွန်တော့်ကို ဒုက္ခိတဖြစ်အောင် လုပ်တယ်။ ကျေးဇူးပြုပြီး ကျွန်တော်တို့အတွက် လက်စားချေပေးပါ”
ယခုအချိန်၌ ကူးယန်သည် တက်ကြွပျော်ရွှင်လို့နေသည်။ သူ့ဦးလေးက သတင်းရပြီး သူ့ကို ကယ်ရန် ပြေးလာသည်ဟု သူ ထင်နေသည်။
ကြောက်မက်ဖွယ်ကောင်းသော နတ်ဘုရား သေနာပတိအဆင့်များကို ကြည့်ပြီး ကူးယန်က လှောင်ပြုံးပြုံး၍ ယဲ့ဖန်အား ရက်စက်သော အကြည့်များဖြင့် လှည့်ကြည့်လိုက်သည်။
သူ့စိတ်ထဲတွင် ယဲ့ဖန်သည် သေပြီးသားလူသာ ဖြစ်သည်။
ကူးယန် ဘက်တော်သား ကူးထျန်းတောင်မှ စိတ်လှုပ်ရှား၍ ကြမ်းကြုတ်သော ချီဓာတ်တို့နှင့်အတူ ပင့်သက်ရှိုက်လိုက်သည်။
“သွားသေလိုက်တော့ ပုရွက်ဆိတ်ကောင်။ မင်း သေသင့်တာကြာပြီ”
ကူးထျန်းက အပြုံးကြီးပြုံး၍ ပြောလိုက်သည်။ ထိုစဉ် ခြေသံများနှင့်အတူ ကူးဖုန်းက ယဲ့ဖန်ထံသို့ ကြမ်းကြုတ်သော ရှေးဦးသားရဲကဲ့သို့ ကြောက်မက်ဖွယ်ကောင်း၍ သန်မာသော ချီဓာတ်များနှင့်အတူ လှမ်းလာသည်။
“စတော့မှာလား”
ကူးယန်နှင့် ကူးထျန်းတို့ နှစ်ယောက်လုံး ပို၍ပင် ပြုံးနေကြပြီး အူမြူးလာကြသည်။
ထိုစဉ် ဝုန်းခနဲ အသံနှင့်အတူ ကူးဖုန်းက ယဲ့ဖန်ရှေ့ ဒူးတစ်ဘက်ထောက်၍ ရင်ဘတ်ပေါ် လက်တင်ကာ နှုတ်ဆက်လာသည်။
“သခင်ကြီးကို ဂါရဝပြုပါတယ်”
ထို့နောက် နတ်ဘုရား သေနာပတိအဆင့် အယောက်ငါးဆယ်တို့ အားလုံး ဒူးထောက်၍ ကျယ်လောင်စွာ နှုတ်ဆက်လာကြသည်။
“အရှင်မင်းမြတ်ကို ဂါရဝပြုပါတယ်”