ငရဲမှလာသောသူ [ Chapter 201 to 400]

Chapter 218

ငရဲမှလာသောသူ
The Man from Hell
Author Autumn Wind 123
ဘာသာပြန် Han Shin

စာစဉ် (15) Chapter (218) မြောင်ဒေသအား ရှင်းလင်းခြင်း

ဖိနပ်ကို ရှပ်တိုက်လျှောက်၍ မသယ်ချင့်သယ်ချင် ခြေလှမ်းများနှင့်အတူ ရွှင်းအာသည် မှုန်မှိုင်းနေသော လမ်းကြားလေးထဲသို့ ဖြည်းဖြည်းချင်း ဝင်ရောက်လာသည်။

လူသတ်ကွင်းသို့ ခေါ်ယူခြင်း ခံရသော ရာဇဝတ်သားကဲ့သို့ သူမ၏ ပိန်သေးသေး ကိုယ်လုံးလေးက အလွန် ညှိုးငယ်ကာ အထီးကျန်ဆန်ဟန် ပေါ်နေ၏။ ခြေလှမ်းတိုင်းတွင် ခဲဆွဲထားသလို လေးလံနေ၏။

သူမ လမ်းကြားလေး၏ အဆုံးသို့ ရောက်လာသောအခါ မှောင်ရိပ်ထဲသို့ ဖြည်းဖြည်းချင်း စိုက်ကြည့်လိုက်သည်။

"ငါ့ရဲ့ ချစ်လှစွာသော ယဇ်ကောင်လေး၊ ငါ မင်းကို စောင့်နေတာ တစ်နာရီလောက် ရှိနေပြီ"

အလွန် ခက်ထန်၍ ကွဲအက်အက် အသံက ရုတ်တရက် လမ်းကြားလေးထဲ၌ ပဲ့တင်ထပ်၍ ထွက်ပေါ်လာသည်။

"မင်းသာ ပေါ်မလာခဲ့ဘူးဆိုရင် လူ ဘယ်လောက်တောင် သေကြေပျက်စီးရမလဲ သိရဲ့လား"

သူ၏ ဆိုးရွားသော စကားအဆုံးတွင် ရွှင်းအာ၏ ချစ်စရာကောင်းသော မျက်နှာလေးက ချက်ချင်း ဖြူရော်လာကာ ပြန်ပြောလိုက်သည်။

"ကျွန်မ အဲ့လူကို ကတိပေးထားပြီးသားလေ၊ ကျွန်မ ကိုယ့်ကတိကိုယ် မဖျက်ပါဘူး၊ ဒါပေမယ့် ကျွန်မကို ယဇ်ကောင်အဖြစ် အသုံးပြုပြီးရင် သူ့ကို ထိခိုက်အောင် မလုပ်ပါဘူးလို့ ရှင် ကျွန်မကို ကတိပေးထားပြီးသားနော်"

"ဒါပေါ့ … ငါ့အရှင်က ပမွှားလေးတစ်ကောင်ကို ခြေထောက်နဲ့ ဖိသတ်ဖို့ စိတ်မဝင်စားဘူး"

ထိုသို့ပြောပြီး မီးခိုးရောင်ဝတ်စုံနှင့် အဘိုးအိုတစ်ယောက် မှောင်ရိပ်ထဲမှ ထွက်လာသည်။ သူ၏ မျက်လုံးများက မြွေပွေးကဲ့သို့ ခက်ထန်၍ အေးစက်လှသည်။ သူ့အသားအရေက ရှုံ့တွလို့နေ၏။

သူ့မျက်နှာ၌ ရက်စက်၍ သွေးဆာသော အပြုံးမျိုး ရှိနေသည်။

"ယဇ်ကောင်လေး သွားကြစို့ … ငါ့အရှင်က မင်းကို စောင့်နေတာ ကြာလှပြီ"