ဗီလိန်ဖြစ်ရန် ကြမ္မာဖန် [Book 1]

(၆၆) တစ်စုံတစ်ယောက်ကို ပန်ကြား၊ လောင်ဖူးရန်ကို အကူအညီတောင်း

Burmese Translation of "Doomed to be Cannon Fodder".

Translator - Jinnie Grace

(၆၆)  တစ်စုံတစ်ယောက်ကို ပန်ကြား၊ လောင်ဖူးရန်ကို အကူအညီတောင်း
_________________________________

နူးညံ့တဲ့အထိအတွေ့မှာ သူမရဲ့နှာသီးဖျားလေးထုံပြီး ပူသွားသလိုခံစားလိုက်ရတယ်။ နှုတ်ခမ်းဖျားကိုနမ်းတဲ့အနမ်းထက် ဒီအနမ်းကပိုပြီးရှုပ်ထွေးတဲ့ခံစားချက်ကိုပေးတယ်။

သူမမျက်နှာလေးနီရဲသွားပြီး လှုပ်ရှားတာရပ်သွားတာပေါ့။ ခေါင်းလေးကိုမော့ကြည့်လိုက်ပေမယ့် အနောက်ကိုနည်းနည်းယိုင်သွားသေးတယ်။ တကယ်တော့ သူမကိုလည်းအပြစ်တင်လို့မရပါဘူး။ နဂိုမူလခန္ဓာကိုယ်ကိုက ဒီလိုပဲ။ အထိအတွေ့မှာ အတော်လေး ဆတ်ဆတ်ထိမခံနိုင်တဲ့ပုံပဲ။  ဘယ်သူကများ ဒီလောက်လှဖို့၊ ဇာတ်ပို့လုပ်ဖို့ပြောလိုက်တာပါလိမ့်။

ဇာတ်ပို့အမျိုးသမီးတွေက ခံစားမှုIQ သိပ်မရှိဘူးဆိုတော့ သူမရဲ့တုံ့ပြန်မှုက ပုံမှန်ပဲ။ ဒါပေမယ့် လုံဟန့်ကတော့ ဖြစ်နိုင်ချေအားလုံးကိုလျစ်လျူရှုပြီး ဒီကောင်မလေးကို သူခြောက်မိပြန်ပြီလို့ပဲ ယူဆလိုက်တော့တယ်။ဒါပေမယ့် သူမက အရမ်းချစ်ဖို့ကောင်းလွန်းလို့ မနေနိုင် မထိုင်နိုင်နဲ့ ပါးလေးကိုဆွဲညှစ်လိုက်ပြီး
" ကိုယ် ဒီနေ့ မင်းအဆောင်ကိုလာခဲ့မယ်"

ပိုင်ရှန်းရှို့ခမျာတော့ ခေါင်းပေါ်ကိုမိုးကြိုးပစ်ချလိုက်သလိုပဲ။ စိတ်ထဲတွေးပြီးသားဆိုပေမယ့် ဒီလိုဘွင်းဘွင်းရှင်းရှင်းပြောတာကြီးကို ဘယ်မိန်းကလေးက လက်ခံနိုင်ပါ့မလဲလေနော်။ တကယ်ဆို သူမက ဘာဆိုဘာမှ မဘာရသေးတဲ့ အပျိုစင်နုနုထွပ်ထွပ်လေး။ဘယ်လောက်ပဲတည်ငြိမ်တယ်ဆိုပါစေဦး ဒီအတိုင်းတော့ရပ်မနေနိုင်တော့ဘူး။ နှင်းဆီသွေးရဲနေတဲ့ ပါးပြင်ကိုလက်နဲ့အုပ်ပြီး ထွက်ပြေးတော့တာပေါ့။

ဒါကလည်းသူမအပြစ်တော့မဟုတ်လေဘူး။ ဘယ်လိုယောကျာ်းမျိုးက မျက်နှာကိုတည့်တည့်ကြည့်ပြီး ရည်းစားစကားပြောလို့လဲ? သူ့ပုံစံက စစ်သည်တော်တွေကို အမိန့်ပေးသလိုကြီး။ ဒီလို အနေရခက်တဲ့အခြေအနေမျိုး ပိုင်ရှန်းရိှု့ တစ်ခါမှ မကြုံခဲ့ဖူးဘူး။ တစ်ယောက်ယောက်က ပေါ်တင်ကြီး လာဖက်လိုက်တာထက်တောင် နေရခက်သေးတယ်။ ဒီလိုကိစ္စမျိုးမှာ ဘာကြောင့်တစ်ဆင့်ချင်းမသွားနိုင်ရသလဲရှင်။ ဒီလိုဒဲ့့ကြီးပြောတော့ မျက်နှာပူရပြီမလား။ မင်းသားရယ်...ရှင်ဘယ်လိုတွေတွေးလိုက်တာလဲ။ ရှန်းရှို့​ေလးက ဒါမျိုးတွေကို ရင်မဆိုင်နိုင်ဘူး သိရဲ့လား?