ဗီလိန်ဖြစ်ရန် ကြမ္မာဖန် [Book 1]

(၁၄၂) ဇာတ်လိုက်မင်းသား သဝန်တိုမှု

Burmese Translation of "Doomed to be Cannon Fodder".

Translator - No Coz

Friendly Reminder - မက်ကျူးဝါး ဒါပေမဲ့ ဒီဟာက အခွီ

(၁၄၂) ဇာတ်လိုက်မင်းသား သဝန်တိုမှု

လုံဟန့် ပိုင်ရှန်းရှို့ကို ဖက်ထားလိုက်တော့တယ်။ သူ့နှလုံးသားက မျောက်တစ်ကောင်လို ရွစိထိုးနေပြီး သူ့စိတ်အလျင်က မြင်းတစ်ကောင်လို ကဆုန်စိုင်းနေတယ်ဆိုပေမဲ့ စုန့်ကျောင်းယွဲ့ ထွက်သွားရင်း သမင်လည်ပြန်လှည့်ကြည့်လိုက်တာကို တွေ့ဖြစ်အောင် တွေ့လိုက်သေးတယ်။ စုန့်ကျောင်းယွဲ့အကြည့်တွေထဲက ရှုပ်ထွေးပွေလီလှတဲ့ ခံစားချက်တွေကို လုံဟန့် ရုတ်တရက် သဘောပေါက်သွားမိတယ်လေ။ သူ့မိတ်ဆွေ ပိုင်ရှန်းရှို့အပေါ်ထားတဲ့ သဘောထားဟာ အသက်သခင်ကျေးဇူးရှင်ဆိုတာလောက်ပဲ မဟုတ်တဲ့အကြောင်း သူ ရိပ်မိလိုက်ပြီ။ ချစ်ခြင်းမေတ္တာရဲ့ အနုစိတ်တွေကို သိပ်ပြီး နားမလည်၊ အကင်းမပါးပေမဲ့ လုံဟန့်က ထူပိန်းနေတာတော့ မဟုတ်ဘူး။

အရင်တုန်းက သူတို့နှစ်ယောက်ကြားက အပြန်အလှန် စကားအပြောအဆို တုံ့ပြန်မှုရှိတာတွေကို သူ မမှုခဲ့ပါဘူး။ ဒါပေမဲ့ အခုတော့ သူကိုယ်တိုင်က ဒီမိန်းကလေးကို ချစ်နေမိတော့ နည်းနည်းပိုပြီး အသိအမြင်တွေ နိုးကြားလာပြီ။ ဆိုတော့ကာ စုန့်ကျောင်းယွဲ့ မျက်ဝန်းထဲက ရိပ်ကနဲ ဖြတ်သန်းသွားတဲ့ ခံစားချက် အထွေးလိုက်ကြီးတွေကို သူ နားလည်နိုင်လာတာပေါ့။ နားမလည်နိုင်စရာလား။ သူလဲပဲ ယောက်ျားတစ်ယောက်လေ။

ခွဲမသွားချင်တာတွေ၊ စိုးရိမ်စိတ်တွေ၊ ချစ်တာ၊ မြတ်နိုးတာတွေ။ အဲ့ဒီလှည့်ကြည့်တဲ့ တစ်ခဏလေးမှာ စုန့်ကျောင်းယွဲ့ မျက်ဝန်းထဲ ဒီခံစားချက်တွေ ထင်ဟပ်နေခဲ့တာပဲ။ ပြီးတော့ အဲ့ဒီခံစားချက်အပြည့် မျက်ဝန်းတွေက သူ့ရင်ခွင်ထဲက မိန်းကလေးကို ကြည့်နေခဲ့တာ။ မိတ်ဆွေရင်း လုံဟန့်တစ်ယောက်လုံး ရှိနေတာတောင်မှ သူ့ခံစားချက်တွေကို မကွယ်ဝှက်နိုင်ခဲ့ဘူး။

'ကောင်းပြီလေ စုန့်ကျောင်းယွဲ၊ ယောက်ျားကောင်းဆိုတာ မိတ်ဆွေရဲ့ ဇနီးကို မတပ်မက်ကောင်းဘူး၊ မင်းက ငါ့အမျိုးသမီးကို မျှော်လင့်ရဲတယ်ပေါ့' သူ့အတွေးတွေထဲ နယ်လွန်သွားမိတာကြောင့် လုံဟန့် လက်ကိုပိုပြီး အားထည့်ပြီး ပွေ့ဖက်ထားလိုက်မိတယ်။ ဖိညှစ်အားပိုပြင်းလာတော့ သူ့ရင်ခွင်ထဲက မိန်းကလေးဆီကနေ ညည်းသံနောက်တစ်သံ ထွက်လာရပါရော။ သူ့နားကို ရောက်တော့ ဒီအသံလေးဟာ အင်မတန် နူးညံ့ပျော့ပျောင်းလှတဲ့ ကညုတုတု ညည်းတွားသံလို ဖြစ်နေလေရဲ့။ ချစ်စရာကောင်းလွန်းတဲ့ အသံလေးကလဲ ရင်ခွင်ထဲကနေ ထွက်လာတယ်။ "ဟင့် နာတယ်. . ."