ဗီလိန်ဖြစ်ရန် ကြမ္မာဖန် [Book 1]

(၁၆၃) အိမ်တော်တွင်း သူခိုးဝင်

Burmese Translation of "Doomed to be Cannon Fodder".

Translator - NC

(၁၆၃) အိမ်တော်တွင်း သူခိုးဝင်

လင်ချန်းဇီ မျက်နှာကို တစ်ဖက်လွှဲပြီး ငိုနေတော့တယ်။ တွမ့်ယွင်ရင် စိတ်ထဲကနေ အေးတိအေးစက် ကြိတ်ရယ်လေတယ်။ ဒီမိန်းမ ခုနက သိပ်ပျော်နေတာလေ၊ ခုမှ ငိုဖို့ သတိရတယ်လား။ "မင်း မလုပ်ဘူးဆိုရင် ကိုယ်ကိုယ်တိုင်ပဲ လုပ်လိုက်တော့မယ်"

"မဖြစ်ဘူး...!" လင်ချန်းဇီ ချက်ချင်း ထထိုင်လိုက်ပြီး သူ့ကို ဆွဲထားလိုက်တော့တယ်။ သူမ မျက်နှာနီမြန်းပန်းသွေးထလျက် ဆိုလာလေတယ်။ "ဟင့်အင်း...! ကျွန်မတို့... ဒါတွေ မဖြစ်ခဲ့ဘူးလို့ပဲ သဘောထားလိုက်ရအောင်"

သူမ ဖြည်းဖြည်းကျောခိုင်းသွားပြီး အဝတ်အစားတွေ ဝတ်လိုက်ကာ ကုတင်ပေါ်က ဆင်းလိုက်တယ်။ ထွက်သွားတော့မလို လုပ်ပြလေတယ်။ ဒါပေမဲ့ တွမ့်ယွင်ရင်က သူမကို ပြန်ဆွဲထားပြီး အလေးထားမေးမြန်းလိုက်တယ်။ "ကိုယ်... လင်အိမ်တော်မှာ လာတောင်းရမ်းရမလား"

"မဖြစ်ဘူး...! ရှင် အဲ့သလိုလုပ်လို့ မဖြစ်ဘူး၊ အဲ့သလိုဆို လုံဟန့်က ရှင့်ကို အလွတ်ပေးတော့မှာ မဟုတ်ဘူး" လင်ချန်းဇီ ပြောပြီးတာနဲ့ ကြေကွဲဝမ်းနည်းစွာ ထွက်သွားတော့လေတယ်။

'ဒီအပျက်ကြီးကို ယူသွားပေးလို့ဆိုပြီး လုံဟန့်ကတောင် ငါ့ကို ကျေးဇူးတင်နေဦးမယ်...!' သူမ အပျိုစင်မဟုတ်တော့ဘူးဆိုတာ မနေ့ညကမှ သူ သိလိုက်ရတာ။ လုပ်သွားတဲ့ ကောင်ကလဲ တော်တော် ကြမ်းမဲ့ကောင်ဆိုတာ သိသာတယ်။ သူမ ကျောပြင်ပေါ်မှာ ထင်ကျန်နေတဲ့ အမှတ်အသားတွေအရ သူတို့ ဟိုဒင်းဟိုဟာကို လွန်ခဲ့တဲ့ နှစ်ရက်လောက်ကမှ လုပ်ထားသေးတာပဲ။ 'ဘယ်သူများဖြစ်မလဲ၊ လော့ယွင်ကျန်းလား၊ လုံဟန့်ပဲလား'

သူ သူမကို အိမ်တော်ဆီ ဘေးမသီရန်မခ စောင့်ရှောက်လိုက်ပို့ပေးချင်လို့ နောက်ကနေ တိတ်တိတ်လေး လိုက်လာသလို ဟန်ဆောင်လိုက်တယ်။ လမ်းတစ်လျှောက်မှာလဲ လူကောင်ထင်အောင် အရိပ် "မတော်တဆ" ပြ ပြ ပေးတယ်လေ။ သူမကို ပြန်ပို့ဖို့ကို သူ စိတ်ရင်းကပါတယ်ဆိုတာ သူမ သိအောင်လို့ပေါ့။ ဒါပေမဲ့ သူ သွားရင်းနဲ့ တွေးနေခဲ့မိတယ်။ လုံဟန့်နဲ့ သူမတို့ရဲ့ မင်္ဂလာပွဲနေ့မတိုင်ခင်ကို အဝှာထပ်လုပ်ရမယ်။ အဲ့ မင်္ဂလာဦးညဆို လုံဟန့် သတိလက်လွတ်အဖြစ်ဆုံး အချိန်ဖြစ်မှာ။