ဗီလိန်ဖြစ်ရန် ကြမ္မာဖန် [Book 1]

(၁၂၃) ပါးနပ်ဉာဏ်များသော မိန်းမ

Burmese Translation of "Doomed to be Cannon Fodder".

Translator - No Coz

(၁၂၃) ပါးနပ်ဉာဏ်များသော မိန်းမ

မိန်းမတစ်ယောက်ကြောင့် ဒီလောက်ကြီး ခြေမကိုက်မိ လက်မကိုင်မိ သရုပ်ပျက်ပျက် ဖြစ်ရတာမျိုး လော့ယွင်ကျန်း ဘဝမှာ တစ်ခါမှ မကြုံဖူးဘူး။ သူ့မျက်နှာ ချက်ချင်း ညိုမည်းသွားပြီး ပိုင်ရှန်းရှို့ရှေ့ကို လျှောက်သွားလိုက်တော့တယ်။ သူမကတော့ လောလောဆယ်မှာ လှပတဲ့ မျက်ဝန်းအိမ်ကျယ်ကြီးတွေနဲ့ သူ ဘယ်သူလဲ၊ ဘာလို့ ဒီလိုလုပ်နေတာလဲလို့ ရိုးအနုံချာစွာနဲ့ မေးနေဟန်ရှိလေရဲ့။

သူမ အကြည့်ထဲက မေးခွန်းအဓိပ္ပာယ်တွေကို လော့ယွင်ကျန်း နားလည်ပါတယ်။ သူမကတော့ သိပ်ပြီး လန့်နေတာမို့ သူမအကြည့်တွေနဲ့ အချက်ပေး စကားပြောနိုင်တယ်၊ အဓိပ္ပာယ်ဖော်လို့ရတယ်ဆိုတာကို သိပုံမရဘူး။ "သခင်မ ပိုင်၊ ကျုပ် ခင်ဗျားကို အကူအညီတစ်ခုလောက် တောင်းစရာ ရှိလို့... ခင်ဗျား လုပ်ပေးနိုင်မယ်ဆိုရင် အကြောဖွင့်ပေးမယ်၊ အလွတ်ပေးမယ်၊ မဟုတ်ရင်တော့..." သူ သူမကို ရက်စက်ခက်ထန်စွာ ကြည့်ရင်း သူ့လက်နဲ့ သူမ ရင်ကို လှမ်းတိုင်းတာဟန် လုပ်ပြလိုက်တယ်။ "ခင်ဗျား အဝတ်အစားတွေ အကုန်ချွတ်ပြီး လမ်းပေါ် သွပစ်ထားလိုက်မယ်"

တစ်ဘက်သားက အဲ့ဒီစကား ကြားလိုက်ရချိန်မှာ အတော်လေးကို ကြောက်လန့်သွားပုံရတယ်၊ မျက်ရည်တွေလဲ ထွက်ကျတော့လုလု၊ ဒါပေမဲ့ တကယ့်တကယ်မှာ သူမက တွေးနေတာ၊ 'ငါ့ကို လမ်းပေါ်ပစ်ချထားမယ်လို့ ပြောရုံနဲ့ ခြောက်လို့ရမယ်ထင်နေတာ သူ ငါ့ကို ကလေးပေါက်စလေးများ မှတ်နေလားမသိဘူး' ဒါပေမဲ့ အခုတော့ ပိုင်ရှန်းရှို့ သူ့စကားနားထောင်မှ ဖြစ်တော့မယ်။ မဟုတ်ရင် သူ တကယ်ကြီး သူမကို တစ်ခုခုလုပ်လောက်တယ်လေ။ 

သူ ဘယ်သူလဲဆိုတာ အစကတော့ ပိုင်ရှန်းရှို့ သတိမထားမိဘူး။ ဒါပေမဲ့ အဲ့ဒီ ခပ်ကြမ်းကြမ်း အရိုင်းဆန်တဲ့ လေသံက အရံဇာတ်ကောင် လော့ယွင်ကျန်းနဲ့ တော်တော်တူနေတယ်။ လော့ယွင်ကျန်းက ဘာကိစ္စ သူမ အခန်းထဲကို ရောက်နေရတာလဲ။ အပြင်က ရဲမက်တွေ အကုန်သေနေပြီလား။ အပြင်မှာ ကင်းလှည့်နေသူတွေရဲ့ ခြေသံတွေကို သူမ ကြားလိုက်ရတယ်။ ကြည့်ရတာ သူတို့တွေ သေသွားကြလို့ မဟုတ်ဘူး၊ တစ်ဘက်သားက ကိုယ့်ဖော့ကျွမ်းကျင်လွန်းလို့သာ။