ဗီလိန်ဖြစ်ရန် ကြမ္မာဖန် [Book 1]

(၁၃၉) ထူးဆန်းသော အဆိပ် (၂)

Burmese Translation of "Doomed to be Cannon Fodder".

Translator - No Coz

(၁၃၉) ထူးဆန်းသော အဆိပ် (၂)

ဘာကြောင့်လဲ၊ ဘာကြောင့်များ သူ သူမကို ဒီလို ဆက်ဆံရတာလဲ။ ဒီလိုအပြုအမူမျိုးနဲ့ ဆက်ဆံခံရလောက်အောင် သူမ ဘာအပြစ်ကျူးလွန်ခဲ့မိလို့လဲ။ "ကောင်းပြီလေ၊ ကျွန်မ. . . ပြန်လိုက်ပါမယ်"

လင်ချန်းဇီ ခုန်ပေါ်က ကာန်းထလိုက်တယ်။ ယိမ်းယိုင် မလဲသွားရအောင် အတတ်နိုင်ဆုံး ကြိုးစားပြီးတော့ပေါ့။ ဒါပေမဲ့ သူမ အတွေးတွေမှာတော့ 'ငါ ဒီလူကြမ်းကြီး ဖြစ်စေချင်တဲ့အတိုင်း ဖြစ်သွားအောင် ငြိမ်ခံမနေနိုင်ဘူး၊ အခွင့်ရေး ရတာနဲ့ ထွက်ပြေးမယ်'ဆိုတာမျိုးတွေပဲ တွေးနေတာ။ 

လုံဟန့်ကတော့ လက်ဟန်တစ်ချက်ပြလိုက်ပြီး သူမကို ခေါ်သွားလိုက်ဖို့ သူ့လက်အောက်ငယ်သားတွေကို အမိန့်ပေးလိုက်တယ်။ သူမက ဒီကြားထဲမှာ ထပြေးဦးမလို့ စဉ်းစားနေတာ၊ ဒါပေမဲ့ ဘယ်လို ကိစ္စပဲ ရှိရှိ၊ သူမ ဘယ်သွားသွား အနားကနေ မခွာဘဲ လိုက်နေရမယ်လို့ အစောင့်တွေကို လုံဟန့်က မှာထားပြီးသား။ ဒါကြောင့်မို့ မင်းစိုးမိုးမျိုးနွယ် လင်သခင်မလေးတစ်ယောက် နေ့ရောညပါ ဝတ်ရုံနက် ကိုယ်ရံတော်တွေ စောင့်ကြည့်ခြင်းခံနေရတာ။ သူမ ရေအိမ်သွားရင်တောင် အပြင်ကနေ စောင့်နေကြသေးတာ။ သူမအတွက်တော့ အနက်ရှိုင်းဆုံး အရှက်ခွဲခံရမှုကြီးပါပဲ။ ဒါပေမဲ့ ဘာမှလဲ မတတ်နိုင်ဘူး။ ဒီလိုအချိန်မျိုးတွေမှာဆို လော့ယွင်ကျန်းက သူမကို ဘယ်လိုအလေးထားခဲ့တယ်ဆိုတာမျိုးတွေ သတိရမိပြန်ရော။ သူ ရောက်လာပြီး ဒီလူတွေကို တိုက်ခိုက်အနိုင်ယူကာ သူမ အခုလို အရှက်တကွဲ အကျိုးနည်းနေရတဲ့ အဖြစ်ကနေ ကယ်ထုတ်သွားရင်ကောင်းမှာပဲလို့ မျှော်လင့်နေမိတော့တယ်။ 

သူမ မသိလိုက်တာက လော့ယွင်ကျန်းဟာ လမ်းတစ်လျှောက်လုံး နောက်ကနေ တိတ်တိတ်လေး လိာက်လာခဲ့တယ်ဆိုတာပါပဲ။ ဒါပေမဲ့ သူက အတွင်းဒဏ်ရာပြင်းပြင်းထန်ထန်ရထားခဲ့တာရယ်၊ ပြီးခဲ့တဲ့ ရက်တွေအတွင်း ပင်ပန်းခံခဲ့ရတာတွေရယ်မို့ သိပ် အင်အားမထုတ်နိုင်သေးဘူး။ ဝင်ပြီး လှုပ်ရှားဖို့ရာ အချိန်မတန်သေးဘူးပေါ့၊ သူမ အနားမှာ စောင့်ကြပ်နေသူတွေကလဲ လုံဟန့်ရဲ့ လျို့ဝှက်ကိုယ်ရံတော်တွေဖြစ်နေပြန်တော့ ရင်ဆိုင်ရလွယ်ကူမှာ မဟုတ်ဘူး။ ဒါကြောင့် သူမ လင်အိမ်တော်ပြန်ရောက်တဲ့အထိ သူ စောင့်နေရုံတတ်နိုင်တော့တယ်။ နန်းတွင်း အမတ်ချုပ်အိမ်တော်က မိန်းကလေးတစ်ယောက်ကို ခိုးပြေးဖို့က လွယ်ပါတယ်။