Burmese Translation of "Doomed to be Cannon Fodder".
Translator - NC
(၁၅၅) နုလွန်းတာမို့ ပြောရခက်
ဘယ်လိုပဲ ဖြစ်ဖြစ် သူမကတော့ ဆက် သရုပ်ဆောင်ရတော့မှာပဲ။ သူမ ရင်ဘတ်ကို အုပ်ကိုင်ထားရင်း မျက်မှောင်ကြုတ်လိုက်ကာ ပျို့အန်ချင်သယောင် ဆက်ဟန်လုပ်နေလိုက်တော့တယ်။ အဲ့ဒီမှာ ကြုံတောင့်ကြုံခဲ အဖြစ်အပျက်ကြီး ဖြစ်လာတော့တာပဲ။ လောင်ဖူးရန် သူမသားကို ဆူတာလေ။ "အခုချိန်မှာ ကလေးမကို အဲ့ဒါတွေ ပြောမနေနဲ့တော့လေ၊ သွား... လည်ချောင်းထဲ နေရသက်သာအောင် တစ်ခုခု ယူတိုက်ချေ"
အဲ့ဒီမှာ အစေခံမလေးတစ်ယောက်က ပိုင်ရှန်းရှို့ကို ရေနွေးတစ်ခွက်လာဆက်သပေးတော့တယ်။ သူမ ရေနွေးကြမ်းတစ်ခွက်သောက်ပြီးတော့မှ နေသာထိုင်သာရှိသွားလေတယ်။ လုံဟန့်ကတော့ သူ့အမေအကြောင်း ကောင်းကောင်းသိတာပေါ့။ သူ့ဖခင် ဆုံးသွားပြီးကတည်းက အမေတစ်ခု သားတစ်ခုပဲ ရှိခဲ့တာ။ အဲ့ဒါကြောင့်လဲ လောင်ဖူးရန်ဟာ သားဖြစ်သူကို လေသံမာမာနဲ့တောင် ဆူပြောတာမျိုး မရှိခဲ့ဘူး။ သို့ပေလျက် အခုနက ပိုင်ရှန်းရှို့ဘက်လိုက်ပြီး သူ့ကို မာန်မဲလိုက်တယ်လေ။
အကြောင်းနောက်ခံတစ်ခုခုရှိရမယ်လို့ သူ ယုံကြည်လိုက်တယ်။ ရုတ်တရက် သူ ပိုင်ရှန်းရှို့ အဆိပ်မိပြီး မူးဝေအော့အန်ခဲ့တဲ့ အချိန်က အဖြစ်ကို သွားသတိရမိလေတယ်။ အဲ့တုန်းက မားမားတစ်ယောက်က ကိုယ်ဝန် ရှိတယ်ထင်ခဲ့သေးတာ။ ဒါပေမဲ့ အဲ့အချိန်မှာ သူတို့နှစ်ယောက်ကြား ဘာမှ မဘာရသေးဘူး။ အထင်လွဲတာ သေချာတာပေါ့။ ဒါပေမဲ့ အခုတော့ သူမက အဲ့တုန်းကလို လက္ခဏာတွေ ဖြစ်နေပြီး ဒီတစ်ခါမှာ သူတို့နှစ်ယောက်က လင်နဲ့ မယားလို နေထားတာရှိနေတယ်။ တကယ်ပဲ သူမက ကိုယ်ဝန်ရသွားတာများလား။ ဒီအတွေးနဲ့တင် လုံဟန့်တစ်ယောက် ဟုန်သွားတော့တာပဲ။ သူ သမားတော် ချက်ချင်း ဆင့်ခေါ်လိုက်တဲ့ အပြင်ကို သမားတော်ကို ကြာလှချည်လားဆိုပြီး ပြစ်တင်နေမိတော့သတဲ့။ "ငါတို့ စောင့်နေရတာ နေ့တစ်ဝက်ရှိတော့မယ်၊ ဘာလို့ ရောက်မလာသေးတာလဲ"
လုံဟန့် လှုပ်လှုပ်ရှားရှား ဖြစ်နေပုံကို ကြည့်ပြီး လောင်ဖူးရန်ကြီးကတော့ ကလေးရှိနေတဲ့ သံသယကို ပိုသေချာ မှတ်ယူမိပြီ။ သမားတော် ရောက်လာတာကို စိတ်အားထက်သန်စွာ စောင့်နေမိတာမို့ ချောင်းတောင် မဆိုးဖြစ်တော့ဘူး။ ပိုင်ရှန်းရှို့ကတော့ ဆွံ့အသွားတာပေါ့။ သူမက လောင်ဖူးရန်ကို တမင်လှည့်စားတာ၊ လောင်ဖူးရန်က သူမ လုံဟန့်နဲ့ အိပ်ရာထဲ လူးလှိမ့်ခဲ့တဲ့ နေ့အတိအကျကို မသိထားဘူးလေ။
YOU ARE READING
ဗီလိန်ဖြစ်ရန် ကြမ္မာဖန် [Book 1]
Historical Fictionဘာသာျပန္ဝတၳဳပါ။ [Zawgyi + Unicode] ___ အမ်ိဳးသမီးဇာတ္ရံအျဖစ္ သူမ ဝတၳဳတစ္အုပ္ထဲ ေရာက္သြားခဲ့တယ္။ အဓိကဇာတ္လိုက္မင္းသားကို တစ္ဖက္သတ္စြဲမက္ေနခဲ့တဲ့ ဇာတ္ေကာင္ေပါ့။ သူမမွာ သူ႔လက္ကိုေတာင္ ဆုပ္ကိုင္ခြင့္မရလိုက္ဘဲ အရွင္လတ္လတ္ရိုက္သတ္ခံရမယ့္ ၾကမၼာရွိေနတယ္လား...