ဗီလိန်ဖြစ်ရန် ကြမ္မာဖန် [Book 1]

(၁၃၅) ဘယ်သူမှန်း သိ

Burmese Translation of "Doomed to be Cannon Fodder".

Translator - No Coz

(၁၃၅) ဘယ်သူမှန်း သိ

တံခါးဖွင့်လိုက်ပြီးတာနဲ့ ဇာတ်လိုက်မကို ဘွားဘွားကြီး တွေ့ရတော့တာပဲ။

ဇာတ်လိုက်မင်းသမီးရဲ့ အသားအရေက အခုတော့ တော်တော်လေး အရောင်အသွေးပြန်တက်လာပြီ။ သူမက နေမကောင်းဖြစ်နေတဲ့အချိန်မှာတောင် လှနေတာ၊ အခုလို နာလန်ထခါစအချိန်မှာဆို သနားစရာ နုနယ်တဲ့ အလှလေး ပေါ်လွင်လျက် ရှိနေတယ်။ သူမရဲ့ ခြေလှမ်းပုံတွေမှာတောင် ကျက်သရေတစ်မျိုး ခညောင်းနေတာ။ သူမ အသွင်ကို တော်တော်လေး ကြော့ရှင်းနေစေတယ်။ ဝတ္ထုထဲမှာ ရေးပြထားတဲ့အတိုင်းပဲ၊ မိန်းကလေးငယ်အဖြစ်ကနေ အမျိုးသမီးတစ်ဦးအဖြစ် ပီပီပြင်ပြင် ရာထူးတက်ပြီးသွားတဲ့အခါမှာ ပိုတောင် စွဲဆောင်မှုကောင်းလာသေးတယ်။ သူမ ပိုးတုံးလုံးကနေ လိပ်ပြာဘဝရောက်သွားသလိုပဲ။ ပြဿနာဆိုလို့ သူ့ကို ပြောင်းလဲအောင် လုပ်သွားသူဟာ ဇာတ်လိုက်မင်းသားမဟုတ်နေတာလေးတစ်ခုပဲရယ်။

တစ်ယောက်ကိုတစ်ယောက် တွေ့လိုက်တာနဲ့ သူမတို့ နှစ်ယောက်စလုံး မင်သက်သွားမိကြတယ်။ အမျိုးသမီးဇာတ်ရံတစ်ယောက်အနေနဲ့ ပိုင်ရှန်းရှို့ မင်သက်သွားမိတာက သူမအရှေ့မှာ တကယ်ကြီး ဇာတ်လိုက်မ ရောက်နေလို့ပဲ။ လင်ချန်းဇီ ကြောင်သွားရတာကကျတော့ အရမ်းကို ပေသလူး ညစ်ပတ်စုတ်ပြတ်နေတဲ့ လူကို မြင်လိုက်ရလို့။ သူ့ကိုယ်ကနေ အနံ့တွေလဲ ဟောင်ဖွာပြီး ထွက်လို့ရယ်။

ဒါပေမဲ့ ဇာတ်လိုက်မင်းသမီး ပီပီ လင်ချန်းဇီဟာ သူများတွေလို နှာခေါင်းကို ညှစ်ပိတ်လိုက်တာ၊ အုပ်ကာလိုက်တာ၊ ခပ်လှမ်းလှမ်းကို နောက်ဆုတ်ရှောင်သွားတာမျိုး မလုပ်ဘူး။ သူမက သဘောကောင်းတယ်လေ၊ သူမ လုပ်မိတာဆိုလို့ မျက်မှောင်လေး နည်းနည်းကြုတ်သွားမိရုံပဲ၊ ဘာလို့ အခုလို နာမည်ကျော် တည်းခိုဆောင်ကြီးက ဘာလို့များ ဒီလို စုတ်ပြတ်နေတဲ့သူကို အလုပ်ပေးထားတာပါလိမ့်လို့ စိတ်ထဲက တွေးနေမိရုံပေါ့။ "ရေနွေးကို ရေစည်ထဲ လောင်းထည့်ထားပေးပါ"

ပိုင်ရှန်းရှို့လဲ ခေါင်းကိုသာ ညိတ်ပြီး ခိုင်းတဲ့အတိုင်း ရေစည်ထဲ ရေပုံးထဲက ရေကို လောင်းထည့်ပေးလိုက်တယ်။ ဒီအလုပ်က တော်တော်တော့ ပင်ပန်းတာပဲ။ ကံမကောင်းချင်တော့ ဇာတ်လိုက်မက ဆက်ခိုင်းနေတယ်။ "နောက် ရေပုံး လေးငါးပုံးစာလောက် ခပ်လာပေးဦး၊ ဒီတစ်ခါ ရေပိုပူပါစေနော်"