ဗီလိန်ဖြစ်ရန် ကြမ္မာဖန် [Book 1]

(၁၁၇) အမျိုးသမီး အရံဇာတ်ကောင် ပြန်လာခြင်း

Burmese Translation of "Doomed to be Cannon Fodder".

Translator - No Coz

(၁၁၇) အမျိုးသမီး အရံဇာတ်ကောင် ပြန်လာခြင်း

ဇာတ်လိုက်မင်းသား သူမနံဘေးမှာ ဒီလိုကြီး ပြောင်ပြောင်တင်းတင်း ဝင်အိပ်လိမ့်မယ်လို့ ပိုင်ရှန်းရှို့ ထင်မထားခဲ့မိဘူး။ ဒါ အံ့သြစရာ မကောင်းလွန်းဘူးလား။ ဆိုတော့ကာ အာပြဲကြီးနဲ့ အော်လိုက်မိတာအတွက် သူမကို အပြစ်တော့ မတင်သင့်ပါဘူး။

တော်သေးတာက သူမ အော်နေတုန်းကို လက်ဖဝါးကြီးကြီးတစ်ဖက်က ပါးစပ်ကို လာအုပ်သွားတယ်။ လုံဟန့် မျက်နှာ မသာမယာနဲ့ ထထိုက်လာပြီလေ။ သူ သူမကို ဘာမှတောင် မလုပ်ရသေးဘူး၊ ဒီလိုကြီး အော်နေစရာလိုလို့လား။ မသိရင် သူကပဲ သူမကို အနိုင်ကျင့်နေသလိုလို။ "စိတ်လျှော့ ကိုယ်ပါ" 

သူမ မျက်ဝန်းထဲမှာ စိတ်ခံစားချက် မျိုးစုံ ပြောင်းလဲသွားတော့တယ်။ သူမ သိသိသာသာလဲ စိတ်အေးသွားတာကို သူ တွေ့ရတော့တယ်။ အဲ့ဒီအချိန်ကလေးမှာ သူ နားလည်လိုက်တာက၊ သူမ ခုနကလို အလန့်တကြားတုံ့ပြန်တာဟာ သူ့ကို ကြောက်လို့ မဟုတ်ဘဲ၊ သူမ ဘေးမှာ အိပ်ပျော်နေတာ ဘယ်သူမှန်း မသိလိုက်လို့ပဲ ဖြစ်တယ်ဆိုတာကိုပေါ့။ သူမ နံဘေးက လူ ဘယ်သူဆိုတာကို အခု သိသွားတော့ သူမ အကြောက်ပြေသွားပုံရတယ်။

သူမ တုံ့ပြန်ပုံကို လုံဟန့်မတော်လေး သဘောကျနေတော့တာပဲ။ သူမကို ပြန်လွှတ်ပေးလိုက်တော့တယ်။ ပြီးတော့ အိပ်ရာက ထပြီး အဝတ်အစားလဲတော့လေတယ်။ တကယ်တော့ သူ့ကို အင်္ကျီလဲပေးတာမျိုးက ပိုင်ရှန်းရှို့ လုပ်ပေးရမှာ။ ဒါပေမဲ့ သူမ လန့်သွားခဲ့တာကို ထောက်ပြီး သူ့အတွက် အဝ်အစားလဲပေးနိုင်မယ်လို့ လုံဟန့် မထင်တော့ဘူး။ ဒါပေမဲ့ ပိုင်ရှန်းရှို့ကတော့ ဒါကို သူမ လုပ်ရမဲ့ အလုပ်တာဝန်လို့ကို မြင်တယ်။ သူမက သူ့ကိုယ်လုပ်တော်လေ။ အဝတ်အစားတွေ ဘာညာ အကုန်လုံးက အသင့် ပြင်ဆင်ပြီးသား။ လုံဟန့်ကိုယ်ပေါ်ကို ခြုံပေးရုံပဲ။

မိမိအလုပ်ရှင်ကို မျက်နှာချိုသွေးရလေဖို့ ပိုင်ရှန်းရှို့တစ်ယောက် သူ့ဆီကို ထသွားလိုက်တော့တယ်။ နောက်တော့ ခါးပတ်ကို ယူလိုက်ပြီး သူ့ရှေ့မှာ ကိုင်ထားပေးလိုက်တယ်။ သူမ လက်ထဲက ခါးပတ်ကို ယူပြီး ခါးမှာ ချည်နေလိုက်ရင်း လုံဟန့်ရဲ့ မျက်နှာပေါ်မှာတော့ သူမရှေ့မှာမှ ပြုံးလေ့ ပြုံးထရှိတဲ့ နှုတ်ခမ်းထောင့်လေးတွေ ကွေးသွားမှုမျိုး တည်ရှိနေလေရဲ့။ နောက်တော့ သူ ပြောလိုက်တယ်။ "သွား၊ အဝတ်အစား သွားလဲချေ"