ဗီလိန်ဖြစ်ရန် ကြမ္မာဖန် [Book 1]

(၁၅၉) မင်းသားလီ အိမ်တော်တွင်းမှာ ဂယက်တစ်သိန်း

Burmese Translation of "Doomed to be Cannon Fodder".

Translator - NC

(၁၅၉) မင်းသားလီ အိမ်တော်တွင်းမှာ ဂယက်တစ်သိန်း

ဘာ့ကြောင့်မှန်း မသိ၊ သူမ နားမလည်နိုင်ဘူး။ လင်မိန်းကလေးက သူမကို မူမမှန်တဲ့ အကြည့်တွေနဲ့ ကြည့်နေတယ်ဆိုတာ ပိုင်ရှန်းရှို့ ခံစားမိတယ်။ သူမ အထင်မမှားရင် အဲ့အကြည့်တွေထဲမှာ ရန်လိုမှုတွေ တစွန်းတစ ပါနေလေတယ်။

ပိုင်ရှန်းရှို့ကတော့ အပြုံးကို မပျက်စေရအောင် ထိန်းနေလိုက်တာပေါ့။ ဒါပေမဲ့ စိတ်ထဲကတွေးနေမိတာကတော့ သူမ လင်ချန်းဇီကို ကြောက်နေစရာ မလိုဘူးလို့လေ။ ပြောရရင် သူမ ကြောက်စရာကို ဟုတ်မနေတာ။ ဝတ္ထုထဲမှာတုန်းက ဇာတ်လိုက်မဟာ ပိုင်ရှန်းရှို့ ဇာတ်ကောင်ကို နည်းနည်းလေးမှ ဒုက္ခမပေးခဲ့ဘူး၊ ရန်မပြုခဲ့ဘူး။ သူမကို ဒုက္ခပေးမဲ့ သတ်မဲ့ ဇာတ်လိုက်မင်းသားကိုလဲ သူမဘက် သိမ်းသွင်းပြီးသားလို ဖြစ်နေပြီ။ သူမ ဇာတ်လိုက်မကို ဘာကိစ္စကြောက်နေစရာ လိုဦးမလဲ။

မကြောက်တော့တာမို့ ပိုင်ရှန်းရှို့ ခါးကို မတ်မတ်ထားနေလိုက်တော့တယ်။ ကံမကောင်းချင်တော့ သူမ ခါးကို အဆန့်လွန်ပြီး နာသွားရလေတယ်။ 'ကြည့်ရတာ ဇာတ်လိုက်မင်းသားကို ယဉ်ပါးအောင် လုပ်ဖို့အတွက် ငါ့ခါးလေးကို စတေးခံ ပေးဆပ်ရတဲ့သဘောပဲ၊ ကျွတ်... အမလေး ငါ့ခါး၊ သေပါပြီဟယ်...!'

"ဒါ တို့ လုပ်ပေးနိုင်သလောက်ပါပဲ၊ အစီအစဉ် နေရာချဖို့အတွက်နဲ့ မင်းကို အလုပ်ရှုပ်စေမိတာတော့ စိတ်မကောင်းဘူး" 'အမေပြောသလိုပဲ ငါက သိပ်သဘောကောင်းလွန်းခဲ့မိတယ်၊ မင်းသား အလေးပေးတဲ့ ကိုယ်လုပ်တော်မအပေါ်ကို ငါ နည်းနည်း ပိုပြီး ပညာပြပေးမှ၊ မဟုတ်ရင် ဒီမိန်းမ ငါ့ခေါင်းပေါ် တက်ပါနေဦးမယ်'

လင်ချန်းဇီက သူမကိုယ်သူမ ပညာပေးလို့ရမဲ့ အနေအထားရောက်နေတယ်ထင်တာ။ တကယ်တော့ အခု ပိုင်ရှန်းရှို့က အိမ်ရှင်သခင်မနေရာမှာ ထိုင်နေတာလေ၊ သူမကတော့ ဧည့်သည်ခုံမှာ ထိုင်နေရတာပေါ့။ သူမက မင်းသားအိမ်တော်ရဲ့ ဝမ်ဖေးဖြစ်ရမှာ၊ ဒါပေမဲ့ အခုတော့ ဧည့်သည်တစ်ယောက်လို ဆက်ဆံခံရတယ်။ လောင်ဖူးရန်ရဲ့ စကားတွေကလဲ သူမ စိတ်ထဲ အဖုအထစ်ဖြစ်နေလေတယ်။ 'နှစ်ရက်လောက်နေပြီးရင် ငါ ပြန်ရမှာပါလို့ ပြောတာ ဘာသဘောပြောတာလဲ၊ အခြေအနေက တွန်းပို့လာပြီး ငါ့မှာ ရွေးချယ်ခွင့် မရှိလို့သာ မဟုတ်ရင် ငါလဲ မင်းသားအိမ်တော်ထဲမှာ လာပုန်းနေချင်ပါ့မလား'