ဗီလိန်ဖြစ်ရန် ကြမ္မာဖန် [Book 1]

(၁၄၇) အပင်မြင့်က ငြိမ်နေလိုသည်၊ သို့ပေလျက် လေအတိုက် မရပ်

Burmese Translation of "Doomed to be Cannon Fodder".

Translator - NC

(၁၄၇) အပင်မြင့်က ငြိမ်နေလိုသည်၊ သို့ပေလျက် လေအတိုက် မရပ်

လုံဟန့်က အဲ့ဒီလူတွေ အားလုံးကို အကျဉ်းထောင်ပို့လိုက်တယ်ဆိုတဲ့ သတင်းကို ယူပြီး ယဲ့မားမား သိပ်မကြာခင် ပြန်လာခဲ့တယ်။ အဖြစ်သနစ်အစုံကို မြင်လိုက်ရတဲ့ သူတွေလဲ မင်းသား ဘယ်လောက်တောင် အာဏာပြပြီး သြဇာကြီးတယ်ဆိုတာကို ပြောနေကြလေတယ်။ သူတို့ စကားတွေက လုံဟန့်ရဲ့ ပုံရိပ်ကို ထိခိုက်စေတာ။ အပြင်လောကမှာက သူ့ဂုဏ်သတင်းက အမြဲ နာမည်ဆိုးနဲ့ ကျော်ကြားနေခဲ့တာပဲ။ သူရဲကောင်းမို့လို့ လူသိများ ထင်ရှားပေမဲ့ သူ့ရဲ့ ခက်ထန်မှုကြောင့် ကောလဟလတွေလဲ အစုံ ပြန့်နှံ့နေတယ်။ ဘယ်လိုပဲ ဖြစ်နေပါစေ၊ သူ့ရဲ့ တိုင်းပြည်ဂုဏ်ဆောင်မှုတွေက ရှင်ဘုရင်ရဲ့ ဂုဏ်ကိုတေညင် လွှမ်းမိုးနေနိုင်တယ်လေ။ မယ်တော်ကြီး သေလွန်သွားပြီးတဲ့ အခါမှာတော့ ဘုရင်က လုံဟန့်ကို အေးစက်စက်သာ ဆက်ဆံတော့တယ်။

တကယ်တော့ မင်းသားလီကို အဲ့သလို ဆိုးသွမ်းယုတ်မာသူဖြစ်အောင် သက်သက် သတင်းလွှင့်နေတာ တစ်ဖွဲ့ရှိနေတယ်။ ဝတ္ထုထဲမှာ တရားခံကို အတိအလင်း ရေးပြထားတာ မရှိသေးပေမဲ့ ဘဟ်သူ ဖြစ်လောက်မလဲ ပိုင်ရှန်းရှို့ သိတယ်လေ။ ဝမ်းတွင်းမည်း ဉာဏ်များတဲ့ အေးတိအေးစက် ဘုရင်။ သူ မင်းသားလီကို မဖယ်ရှားပစ်ချင်ဘူး၊ ဒါပေမဲ့ မင်းသားလီ ခေါင်းမထောင်နိုင်အောင်တော့ ချိုးနှိမ်ထားချင်တယ်။ ဒီနည်းအားဖြင့် လုံဟန့် လက်ထဲရှိနေတဲ့ စစ်အင်အားကို သူ ဖြည်းဖြည်းချင်း ပြန်ယူမလို့၊ ဒါမှ မဟုတ် အဲ့ စစ်အင်အားကို တခြားဘက်ကို ပြန်လွှဲပေးတာမျိုး လုပ်မလို့ပေါ့။

လောလောဆယ်မှာ ဒီဘုရင်မှာ အသုံးကျတဲ့ လက်အောက်ငယ်သား မရှိသေးဘူး။ ဒါပေမဲ့ သူ့မှာ အသုံးကျတဲ့ နောက်ပါးစေ ရလာရင်တော့. . .

'အသုံးကျမဲ့သူ...? ဟုတ်သားပဲ၊ အဲ့ဘုရင် အသုံးကျတဲ့ သူ ရှာတွေ့သွားတယ်လေ၊ အဲ့လူက အရံဇာတ်ပို့မင်းသားတောင် ဖြစ်နေလိုက်သေး၊ ခဏ. . . မင်းကြီးကိုယ်တိုင်ကိုက အရံဇာတ်ကောင်တစ်ယောက်ကိုး' ကြည့်ရတာ ဇာတ်လိုက်မင်းသားနဲ့ ဇာတ်လိုက်မင်းသမီးတို့ လက်မထပ်ခင် သူနဲ့ တွေ့ရသေးပုံပဲ။ ဒါပေမဲ့ အဲ့လက်ထပ်ပွဲ အချိန်ရောက်ဖို့က တော်တော်လိုသေးတယ်။ ပိုင်ရှန်းရှို့ အများကြီးလဲ တွေးမနေချင်တော့ဘူး၊ အတော်လေး ပင်ပန်းနေပြီ။