Unicode
အပိုင်း(၂၈) ကျော်ကြားလာရန် (၂)
ယဲ့ကျန်းက ဆရာမရှန်းကို ကြည့်လိုက်သည်။ သို့သော် ငြိမ်းချမ်းစွာ ပြုံးပြနေကြောင်း မြင်လိုက်ရကာ သူမ၏ လုပ်နိုင်စွမ်းအားကိုလည်း ယုံကြည်မှု ရှိနေဟန်ရသည်။
လေထု အခြေအနေက လေးလံ သိပ်သည်းလာသည်။ ဦးဆောင် ကျင်းပသူ ဖြစ်သော သခင်မဝူက ပြုံးကာ ပြောလိုက်၏။
"ဒီနှစ် ပွင့်တဲ့ ခရေပန်းတွေက အရမ်းလှတယ်။ အားလုံးပဲ ခရေပန်းတွေရဲ့ အလှကို ရှုစားကြရအောင်လား"
"အကြံကောင်းပဲ"
သခင်မကြီးလုကလည်း အခြားသူများ၏ လျှို့ဝှက်စွာ အထင်တသေး ကြည့်နေခြင်းကို မသက်မသာ ခံစားလာရလေကာ သူတို့၏ ရင်ထဲတွင် ရှိသော ခံစားချက်များကို မပံ့ပိုး လိုတော့ပေ။ အပြန်အလှန်အနေဖြင့် သူမကလည်း သည်လို မျက်နှာ နှစ်ဖက်နှင့် လူများကို ရွံ့ရှာလေသည်။
ပန်းတွေကို ကြည့်တာမှ ဒီနေရာမှာ နေတာထက် ပိုသာအုံးမယ်။
သို့ရာတွင် လုဖန်းနှင့် လုကျင်းတို့၏ နှလုံးသားကမူ ထွက်သွားချင်စိတ် မရှိသေးပေ။ ထို့ကြောင့် သူတို့က ဒီနေရာတွင် နေပြီး အခြားသော မိသားစုမှ သခင်မလေး များနှင့် စကားပြောရန် ဆုံးဖြတ်လိုက်ကြ၏။ ယဲ့ကျန်းက သခင်မကြီးလု၏ လက်ကို ကိုင်ထားပြီး ဝါးတောဘက်သို့ ထွက်လာခဲ့လိုက်သည်။
သူတို့ အဖွဲ့ ခြေလှမ်း အနည်းငယ် မလျှောက် ရသေးခင်မှာပင် အသံများကို ကြားလိုက်ရသည်။ အမိန့်သံ ဖြစ်၏။
"ဝမ်ဖေး ရောက်လာပါပြီ"
ယဲ့ကျန်းက သခင်မကြီးလု၏ လက်ကို ထိတ်လန့်တကြား ဆုပ်ကိုင် မိသွား၏။ သူမ၏ ကျောရိုးတစ်လျှောက် အေးစိမ့်သော ခံစားချက်က ပြန့်လွင့် သွားခဲ့သည်။ နှလုံးသားထဲမှ ထိုးထွက်လာသော ဒေါသက စတင် ဆူပွက် လာခဲ့ကာ ရင်ဘတ်မှ သားရဲတစ်ကောင် ခုန်ထွက် လာတော့မည့် အလား ဟိန်းဟောက် လာတော့မည့် အလား ထင်ရ၏။
စိတ်အတွင်း ကြာရှည်စွာ ပျောက်ကွယ်နေခဲ့သော မှတ်ဉာဏ်များစွာက စမ်းရည် ကဲ့သို့ ထိုးထွက်လာသည်။
"ကျေးဇူးတင်ပါတယ်၊ အစ်ကိုကြီး။ အစ်ကိုကြီးက ယဲ့ကျန်းရဲ့ ယုံကြည်မှုကို ရခဲ့လို့ သူနဲ့ အရှင်မင်းကြီးနဲ့ ပတ်သက်တဲ့ အတိတ် အကြောင်းတွေကို သိခဲ့ရတာပဲ။ အဲဒါကြောင့်သာ မဟုတ်ရင် အရှင်မင်းကြီးက သူ့ကို ငယ်ငယ်က ကယ်ခဲ့တဲ့ သူက ညီမပါလို့ ဘယ်သိပါ့မလဲ"
"ကံကောင်းစွာနဲ့ ငါ တံဆိပ်ပြားကို အချိန်မီရခဲ့တယ်။ ယဲ့ကျန်းက သေပြီ၊ လူတိုင်းက သူမ သတ်သေခဲ့တယ်လို့ပဲ ယုံကြည်နေကြတာ"
"သူမက အခု ကောင်းကင်မှာ ရောက်ပြီး အရှင်မင်းကြီးက ညီမကို အရမ်း ချစ်နေတာကိုသာ မြင်သွားခဲ့မယ် ဆိုရင် မနာလိုလွန်းလို့ သွေးအန် နေလောက်တယ်"
"ဒါတွေ အားလုံးက မင်းအပေါ် မူတည်သွားပြီ ရှင်းအာ။ မင်းက ဝမ်ဖေးပဲ။ သူမက ဝမ်ဖေး မဟုတ်တော့ဘူး"
ယဲ့ကျန်း၏ စိတ်ထဲတွင် ၂ နှစ်တိုင်တိုင် သူမ ကြားခဲ့ရသော ထိုရွံ့ရှာဖွယ် ကောင်းသည့် စကားလုံးများကို သတိ ရလာခဲ့သည်။ သူမ ပိုင်သော ကျောက်စိမ်း တံဆိပ်ပြားကို ကိုင်နေသော လုဝူရှန်းကို သူမ စိုက်ကြည့် နေခဲ့ရ၏။ မော့ရုန်ကျန်းက သူမကို ချစ်မြတ်နိုး နေခြင်းကို စိုက်ကြည့် နေခဲ့ရသည်။ သူမ ယဲ့ကျန်း၏ တုံးအမှု၊ ရူးသွပ်မှုများကို လှောင်ရယ် နေသော်လည်း အနားတွင် သူမ ရှိနေမှန်း လုဝူရှန်း မသိခဲ့လောက်ပေ။
သူမ ဘဝတွင် လုပ်ခဲ့သည့် အထဲ အရူးသွပ်ဆုံး အရာက လုလင်ကျစ်ကို ယုံခဲ့ခြင်း မဟုတ်ဘဲ မော့ရုန်ကျန်းကို လက်ထပ် ခဲ့ခြင်းသာလျှင် ဖြစ်သည်။
ယဲ့ကျန်း၏ အနားတွင် ရှိနေသော သခင်မကြီးလုကလည်း တင်းကြပ်သွားသော အခြေအနေကို ခံစားမိဟန်ဖြင့် သူမ စိတ်လှုပ်ရှားနေသည် ထင်ပြီး နှစ်သိမ့်လာသည်။
"ဝမ်ဖေးက သမီးရဲ့ အစ်မလေ ကြောက်ဖို့ မလိုဘူး"
"အဖွား သမီး သမီးက ဝမ်ဖေး သဘောမကျသလို ဖြစ်စေမှာကို စိုးရိမ်တာပါ"
ယဲ့ကျန်းက ဖျော့တော့စွာ ပြောသည်။
ပထမဦးစွာ ယဲ့ကျန်းက လုဝူရှန်း သူမ၏ ရုပ်ရည်ကို မှတ်မိ နေမည်ကို စိုးရိမ်သည်။ သူမနှင့် လုဝူရှန်း၏ အဆင့်အတန်းက အတိတ်အချိန်က အလွန် ကွာခြားခဲ့၏။ သူတို့ ပိုင်ဟွားတွင် စတွေ့ခဲ့စဉ်က သူမ ၇ နှစ်ခန့်သာလျှင် ရှိသေးသည်။ ထိုနောက်ပိုင်း သူမတို့ ဆက်မတွေ့ကြတော့ပေ။
လုဝူရှန်း သူမကို မှတ်မိရန် မဖြစ်နိုင်ပေ။ ယဲ့ကျန်း အနေဖြင့် လုဝူရှန်းက မော့ရုန်ကျန်း၏ နှလုံးသားကို အပိုင် ရထားသည်မှာ သူ့ကို ကယ်ခဲ့သည်မှာ သူမ ဖြစ်နေသည်ဟု တစ်ဖက်သူက ယုံကြည်နေ၍ ဖြစ်ကြေင်း ကောင်းစွာ နားလည်နေခဲ့သည်။ ပြောရလျင် သူမ လုလင်ကျစ်ကို များများစားစား ပြောထားခဲ့ခြင်း မရှိပေ။ ထို့ကြောင့် လုဝူရှန်း၏ စစ်မှန်သော မျက်နှာကို ဖယ်ခွာရန်က မခက်ခဲနိုင်ပေ။
သို့ရာတွင် မော့ရုန်ကျန်းနှင့် သူမ မပတ်သက် မိစေရန် ကြိုးစားရအုံးမည် ဖြစ်သည်။ သူမကသာ သူ့ကို ကယ်ခဲ့သူ ဖြစ်ကြောင်းကို မော့ရုန်ကျန်းကို မသိစေချင်ပေ။
သူမ ဖျားနာခဲ့ပြီး သူနှင့် မတွေ့ နိုင်ခဲ့ချိန်တွင် သူမ ပိုင်ဆိုင်သော သစ်သား သေတ္တာကို ထိုနေရာတွင် မြှုပ်နှံထားခဲ့၏။ ထိုအရာ ထိုနေရာတွင် ရှိနေမည်လား သူမ မသိနိုင်ပေ။ ထိုသေတ္တာကသာ ရှိနေခဲ့မည် ဆိုလျှင် သေချာပေါက် ရှာပြီး ဖျက်ဆီး ရပေမည်။
မော့ရုန်ကျန်းနှင့် ပတ်သက်ပြီး မည်သည့်အရာကိုမှ သူမ၏ စိတ်ထဲတွင် ထားရစ်တော့မည် မဟုတ်ပေ။
သခင်မကြီးလုက သစ်သား တဲအနားသို့ ပြန်သွားသည်။ လူတိုင်းက ဒူးထောက်လိုက်ကာ လုဝူရှန်းကို နှုတ်ဆက်လိုက်၏။
ယဲ့ကျန်းက အံကို ကြိတ်ထားသည်။ ဒေါသများကို မျိုသိပ်ပြီး လည်ချောင်းကို အကောင်းဆုံး ထိန်းထားရ၏။ သူမ ရွံ့ရှာလှသော သူတစ်ယောက်ကို သခင်မကြီးလု နှင့်အတူ ဒူးထောက်လိုက်ရသည်။
သူမ၏ ဒူးများက မြေပြင်သို့ ထိသွားသည်နှင့် ပြင်းထန်သော နာကျင်မှုက တစ်ကိုယ်လုံး အနှံ့ ပြန့်လွင့်လာခဲ့သည်၊ ဒါက ဒူးမှ လာခြင်း မဟုတ်ဘဲ နှလုံးသားကို အပ်များ ထိုးသွင်းနေသည့်အလား ပြင်းထန် စူးရှသော နာကျင်မှုမျိုး ဖြစ်၏။
သူမကို သေစေခဲ့သော မိန်းမကို သူမက ဒူးထောက် နေရသည်။ သူမ မုန်းတီးလွန်းသော်လည်း ထိုခံစားချက်ကို မျိုသိပ်ရန်သာ တတ်နိုင်၏။
ယဲ့ကျန်းသာလျှင် ဒီလို ပြင်းထန်သော နာကျင်မှုကို ခံစား နေရကြောင်း နားလည်နေသည်။
...
