Unicode
အပိုင်း (၅၁) နှေးကွေးသောပြောင်းလဲမှု(၁)
ယဲ့ကျန်းကမူ သူမ တောအုပ်ထဲတွင် လုပ်ခဲ့သောကိစ္စကြောင့် ဘာတွေ ဆက်ဖြစ်သွားမှန်း နားမလည်ထားပေ။ သူမ၏ခံစားချက်များကို မောင်းထုတ်ပြီးနောက် ထိုနောက်ဆုံးကျန်သော ဘရိုကိတ်အပိုင်းအစကို ဖျက်ဆီးလိုက်နိုင်ကတည်းက သူမ၏နှလုံးသားထဲရှိ ချစ်ခြင်းတရားများအားလုံးက ပျောက်ကွယ်သွားပြီဖြစ်သည်။ သူမ ဘာကိုမှ နောက်လှည့်ကြည့်ရန် မလိုအပ်တော့ပေ။
သို့သော် ဒါကပင် လုဝူရှန်းကို မော့ရုန်ကျန်း သံသယဝင်စေခြင်းဖြစ်သည်။
သူမ လေလွင့်ဝိညာဉ်ဖြစ်ခဲ့ချိန်က ယဲ့ကျန်းအနေဖြင့် မော့ရုန်ကျန်းသည် ထိုအချိန်က သူ့ကို ကယ်ခဲ့သောသူက လုဝူရှန်း မဖြစ်နိုင်ကြောင်းကို သံသယ တစ်ခါမှ မဝင်ခဲ့ဖူးခဲ့ပေ။ အများဆုံးအနေဖြင့် သည်လိုမမျှော်လင့်ထားသော အံ့ဩဖွယ်ဖြစ်ရပ်မျိုး ဖြစ်လာမည်ဟုလည်း ယဲ့ကျန်းကိုယ်တိုင် မမျှော်လင့်ထားခဲ့ပေ။
ရှင်းလင်းဖော်ပြ၍မရနိုင်သော ရုတ်တရက်ပြန်လည်မွေးဖွားလာခြင်းကို ဖယ်ထားလိုက်မည်ဆိုလျှင် ဒါက သူမအတွက် ကောင်းကင်ဘုံမှ ပေးအပ်သော လက်ဆောင်တော်ဖြစ်သည်။ ထိုလက်ဆောင်တော်က သူမ၏ညာဖက်လက်ဖဝါးတွင် ရှိနေခဲ့၏။
လင်းချွမ် ဒီလင်းချွမ်နဲ့ဆိုရင် ငါ ပိုပြီး ချောမောကြည့်ကောင်း ဖြူဖျော့လာလိမ့်မယ်။
အထက်တန်းလွှာမိသားစုများမှ သခင်မလေးများကဲ့သို့ ဖြူဖျော့လာခြင်းမရှိလျှင်ပင် သူမ မြို့တော်သို့ စရောက်ခဲ့ချိန်ကကဲ့သို့ တောရိုင်းမပုံစံထက် အများကြီးသာပေလိမ့်မည်။
သူမ၏အသားအရေက ယခင်ကကဲ့သို့ မည်းမှောင်ကာ ခြောက်သွေ့မနေတော့ပေ။ သူမ၏ပါးပြင်က နေလောင်ခံထားရခြင်းကြောင့် မဲကာနီစပ်နေခြင်းမှလည်း ပျောက်ကွယ်လာခဲ့ချေပြီ။ သူမ၏မျက်ဝန်းကလည်း ယခင်ကထက်ပို၍ ကြည်လင်လာခဲ့ကာ နေမကောင်းဖျားနာမှုကြောင့် မျက်ကွင်းမည်းခြင်းကလည်း သက်သာလာခဲ့၏။ သူမ၏ မျက်နှာအပြင် ခန္ဓာကိုယ်ကလည်း သိသိသာသာ ဖွံ့ထွားလာခဲ့သည်။
ယဲ့ကျန်းအနေဖြင့် အချို့သောပြောင်းလဲမှုများက သူမကို ပို၍ မိန်းမဆန်လာစေကြောင်း နားလည်နေသည်။ အထူးသဖြင့် ယခင်ကထက် သူမ၏ရင်က ပိုပြည့်လာသည်။ ယခင်အဝတ်များက နှစ်လက်မခန့် ပို၍ တိုသွားသည်။ သူမက အချိန်တိုအတွင်း အရပ်ရှည်လာခြင်းဖြစ်သည်။ ကံကောင်းသည်မှာ သူမ အဝတ်အသစ်များရထား၏။ မဟုတ်လျှင် ဝတ်ရန်သင့်လျော်သော အဝတ်အစားများပင် ရှိတော့လိမ့်မည်မဟုတ်ပေ။ သူမ၏အဝတ်တိုများအောက်မှ အတွင်းဝတ်များ ဆိုလျှင်လည်း သူမ၏အသားအရေနှင့်ပင် ရောင်ပြန်ဟပ်မတတ်ဖြစ်နေ၏။
“ဆရာမ ဝင်ခွင့်စာမေးပွဲမှာဖြေဆိုရမဲ့ အနုပညာခြောက်မျိုးမှာ တူရိယာတီးခတ်ခြင်းကလည်း ပါဝင်တယ်မဟုတ်လား၊ ပုံမှန်အားဖြင့် စစ်ဆေးတဲ့သူက ကုချင်းကို အသုံးပြုခိုင်းကြတယ်၊ ကျွန်မ အခြားတူရိယာကို သုံးလို့အဆင်ပြေနိုင်မလား”
ယဲ့ကျန်းအနေဖြင့် ဝင်ခွင့်စာမေးပွဲကိုဖြေဆိုရာတွင် သူမ၏ကုချင်းစွမ်းရည်ကို မပြသလိုပေ။ အကြောင်းမူကား ကုချင်း၏လက်ရာကိုကြည့်ရုံမျှဖြင့် ထိုလူအကြောင်း ပြောပြနိုင်နေသောကြောင့် ဖြစ်သည်။ ထို့အပြင် ကုချင်းကိုတစ်ခါမှ ထိတွေ့ခဲ့ဖူးခြင်းမရှိသော နယ်မြို့လေးမှ တက်လာသည့် မိန်းကလေးတစ်ယောက်က ချက်ချင်း ထူးချွန်စွာတီးခတ်နိုင်သွားလျှင် ဒါက အလွန်သံသယဝင်ရန် ကောင်းနေပေလိမ့်မည်။
ယခင်ဝမ်ဖေးယဲ့ကျန်းက ကုချင်းတွင် အတော်ဆုံးတစ်ယောက်ဖြစ်ကြောင်း အင်ပါယာတစ်မြို့တော်လုံး သိကြသည်။ ထပ်ပြောရန် မလိုလောက်အောင် အမျိုးသမီးအကယ်ဒမီမှ ဆရာတိုင်းနီးပါး သိထားကြ၏။ ထိုထဲတွင် ဆရာမရှန်းကလည်း တစ်ယောက်အပါအဝင်ဖြစ်သည်။ သူမသည်လည်း တူရိယာတွင် အလွန်ကျွမ်းကျင်သော ပညာရှင်တစ်ယောက်ဖြစ်သည်။ ထို့ကြောင့် ယဲ့ကျန်း၏လက်ရာကို ကြည့်ရုံမျှဖြင့် သာမန်စတင်သင်ကြားခြင်း အဆင့်မဟုတ်မှန်း သိသွားပေလိမ့်မည်။
“ဒါဆိုရင် မင်းက ဘာကိုတီးခတ်ချင်တာလဲ”
ဆရာမရှန်းက မျက်မှောင်ကြုတ်သည်။ သူမ၏နဖူးကြောက တွန့်သွား၏။
လုယောင်ယောင်၏ပါရမီ၊ သူမ၏ လစ်လပ်ခြင်းများအတွက် သူမ စိုးရိမ်နေခြင်း မဟုတ်ပေ။ ထို့အစား သူမ၏ကျောင်းသူက အရာအားလုံးကိုလွယ်ကူစွာ လုပ်ဆောင်နိုင်စေချင်ရုံမျှသာဖြစ်သည်။
ထိုအရာများအပြင် အကယ်ဒမီစာမေးပွဲက ချဉ်းကပ်ဝင်ရောက်လာနေခဲ့ချေပြီ။ ကုချင်းကို အသုံးပြုခြင်းကပို၍ အဆင်ပြေပြီး ကျွမ်းကျင်အဆင့် တက်မြောက်ရန် အချိန်လိုအပ်နိုင်သေး၏။
ဖြစ်နိုင်တာက တတိယသခင်မလေးက သူမနဲ့ပိုပြီးသင့်တော်တဲ့ တူရိယာကို ရှာတွေ့ထားလို့လား။
ဆရာမရှန်းက ထိုသို့တွေးလိုက်သည်။
“ဗုံပါ”
ယဲ့ကျန်းက သူမ ယခင်က သည်လိုပါရမီမျိုး မပြခဲ့ဖူးကြောင်း မှတ်မိသွားသည်။ မည်သူကမျှ သူမ ဗုံတီးနိုင်ကြောင်း မသိကြပေ။ သူမ၏အစေခံနှင့် သူမ၏ဖခင်ကသာလျှင် သိကြ၏။ သို့သော် သူတို့နှစ်ယောက်လုံး သေသွားခဲ့ကြချေပြီ။
ဆရာမရှန်းက သူမ၏လက်ပေါ် မေးစေ့ကိုတင်ထားလျက် ဒါက အကြံဆိုးမဟုတ်ဟု တွေးလိုက်သည်။
“ဗုံအမျိုးအစားတွေ အများကြီးရှိတာပဲ၊ မင်း ဘယ်တစ်ခုကို ရည်ရွယ်တာလဲ”
“ကခုန်ပြီး တီးခတ်ရတာပါ ဆရာမရှန်း”
သူမ၏ကုချင်းစွမ်းရည်ကို ထုတ်မပြဘဲ ကခုန်ရင်းမှ တီးခတ်ပြလိုက်ခြင်းကလည်း လိုအပ်ချက်နှင့် ကိုက်ညီသည်ဟု သူမထင်သည်။
ရှေးခေတ်အချိန်ကဆိုလျှင် ဗုံတီးခတ်ခြင်းက ကောင်းကင်လက်နက်ဟုပင် တင်စားကြသေး၏။ ဗုံက စစ်သည်တော်တွေကို အားအင်တက်ကြွစေရန် အားပေးနိုင်စွမ်းရှိသည်။ စတေးခြင်းအခမ်းအနားများ၊ အောင်ပွဲခံခြင်းအခမ်းအနားများ စသည်ဖြင့် အခမ်းအနားများတွင်လည်း တစ်စိတ်တစ်ပိုင်းပါဝင်၏။ ဗုံက လူတိုင်းကို စိတ်အားတက်ကြွအောင် လုပ်နိုင်စွမ်းအားရှိသည်။ သို့ရာတွင် အမျိုးသမီးများတွင် လုံလောက်သော ခွန်အားမရှိသည့်အတွက် တီးခတ်နိုင်ခြင်းက မဖြစ်နိုင်ခဲ့ပေ။ ထို့ကြောင့် သာမန်အားဖြင့် ရွေးခဲကြ၏။
ယဲ့ကျန်းကသာ ထူးခြားစွာ ဖျော်ဖြေလိုက်မည်ဆိုလျှင် သူမက အာရုံအများစုကို ဆွဲဆောင်နိုင်ပေလိမ့်မည်
ဆရာမရှန်းကလည်း တတိယသခင်မလေးသည် သူမ ထင်ထားသည်ထက် ဉာဏ်ကောင်းနေကြောင်း နားလည်လိုက်သည်။ ထို့အတွက် ကျေနပ်သွား၏။ ထိုကဲ့သို့ ဉာဏ်ကောင်းခြင်းက သူမ၏ယခင် တပည့်များထက်ပင် သာလွန်နေသေးလေသည်
“အရင်က တခြားသူတွေ ဗုံတီးတာကို ငါမမြင်ခဲ့ဖူးသေးဘူး၊ ဆိုတော့ ဗုံအကြီးတွေက ရှာဖို့ခက်လိမ့်မယ်”
ဆရာမရှန်းက ပြောသည်။
“ဗုံအကြီးတွေ လုပ်လို့ရတဲ့နေရာတစ်ခုကို ကျွန်မ သိထားတယ်၊ ဆယ်ရက်လောက် လိုနေသေးတာဆိုတော့ လေ့ကျင့်အဖို့အတွက်လည်း အဆင်ပြေမယ်လို့ ကျွန်မ ထင်တယ်”
ယဲ့ကျန်းက စိတ်လှုပ်ရှားစွာပြောသည်။
လက်ခုပ်တီးပြီးနောက် ဆရာမရှန်းက ဆုံးဖြတ်ချက်ပြတ်သားနေသော သူမကိုကြည့်သည်။
“မင်း အခုဆုံးဖြတ်ချက်ချပြီးပြီဆိုမှတော့ ပြဿနာမရှိတော့ဘူး၊ ကျန်တဲ့အနုပညာသုံးမျိုးကိုသာ အောင်နိုင်မယ်ဆိုရင် အဆင်ပြေသွားပြီ”
...
