အပိုင်း ၁၃၈
ယဲ့ကျန်းက အမျိုးသမီးအကယ်ဒမီထံမှ အကြောင်းကြားစာ ရောက်လာသောအခါမှသာ စိတ်အေးသွားနိုင်လေသည်။ သူမနှင့် သူမ၏မိသားစုကို အမှားလုပ်ခဲ့သော ထိုသူများအတွက် အပြစ်ဒဏ် ပြန်ပေးမည့်အထဲမှ အပျော့စားအလုပ်ကို စလုပ်ပြီးအရာအားလုံးကို သူမ၏လက်ဖြင့် ကိုယ်တိုင်ကိုယ်ကျ ကိုင်တွယ်ဆုံးဖြတ်နိုင်ရန် ဒါက ပထမခြေလှမ်းဖြစ်ကြောင်း သူမ နားလည်နေသည်။
အခု ငါက တော်ဝင်အမတ်တစ်ယောက်ရဲ့ အလိုလိုက်ခံထားရတဲ့ သမီးတစ်ယောက် မဟုတ်တော့ဘူး၊ အရာအားလုံးကို ငါ ကိုယ်တိုင်ကိုယ်ကျ ကိုင်တွယ်ရတော့မယ်။
သူမ၏ ကလဲ့စားချေမည့်စာရင်းတွင် လုလင်ကျစ်နှင့်လက်ရှိဝမ်ဖေး၊ လုဝူရှန်းတို့ပါ သည်။ မော့ရုန်ကျန်းအတွက်ကမူ သူမ အပြည့်အဝ လုပ်ဆောင်နိုင်စွမ်းရှိမျှသာလျှင် ကိုင်တွယ်နိုင်လောက်သည်။ သူမ၏လက်ရှိအင်အားကြောင့်ပင် ဖြစ်စေ၊ နောက်ခံမရှိသော အခြေအနေကြောင့်ပင်ဖြစ်စေ၊ သူ့ကို ကလဲ့စားမည်ဟု ပြောနေခြင်းက သံသယဝင်ရန် မလိုလောက်အောင် ကျောက်ဆောင်ကို ကြက်ဥဖြင့် ပစ်ပေါက်သလိုဖြစ်နေပေလိမ့်မည်။
လုအိမ်တော်ကလည်း ယဲ့ကျန်း၏အမျိုးသမီးအကယ်ဒမီသို့ သွားမည့်ခရီးအတွက် ပြင်ဆင်ပေးပြီး ဖေးရှီက သမီးဖြစ်သူ အကယ်ဒမီသို့ ယူသွားမည့်ပစ္စည်းကို ပျော်ရွှင်စွာ ထုပ်ပိုးပြင်ဆင်ပေးလေသည်။
လူတိုင်းက အလုပ်များနေချိန်တွင် လုရှန်းကျစ်ကသာ ယဲ့ကျန်းနှင့်မိခင်ဖြစ်သူ၏ အနားတွင် ဆက်တိုက်စကားပြောနေနိုင်စွမ်းရှိသည်။ ထိုအချိန်တွင် သူက မင်းသမီးလျှိုဟွားက ယဲ့ကျန်း၏ငွေများကို ချက်ချင်းမပေးဘဲ မည်သို့အချိန်ဆွဲကြောင်း စီကာပတ်ကုံး ပြောပြနေခြင်းလည်းဖြစ်သည်။
"အစက သူမက စာရွက်စာတမ်းတွေကို အသိအမှတ်မပြုချင်ကြောင်း ငြင်းဆန်သေးတယ်၊ နောက်ပိုင်းမှာ အစ်ကိုထျန်းက ကာကွယ်ပြောဆိုပေးတာနဲ့ မင်းသမီးလျှိုဟွားရဲ့မျက်နှာက အစိမ်းရောင်သန်းသွားပါလေရော၊ အစ်ကိုကလည်း မြို့တော်မှာ သူမအချိန်အတန်ကြာတဲ့အထိ မျက်နှာပြရဲမယ်လို့မထင်ဘူး"
