Unicode
အပိုင်း ၃၂။ ယဲ့ကျန်းနှင့်ဧကရာဇ်လေး (၂)
သုံးလခန့်ကြာပြီးနောက်တွင် ယဲ့ကျန်းလေးက ပြင်းပြင်းထန်ထန် နေမကောင်းဖြစ်ပြီး တောအုပ်ထဲသို့ မသွားနိုင်ခဲ့ပေ။ ထိုအချိန်ပြီးနောက် သူမ ပြန်လည်သက်သာလာသောအခါ အပြင်ထွက်ခွင့်ရသွားလေပြီ။ သို့သော် ထိုအချိန်က နှစ်ဝက်ခန့် ကြာသွားပြီဖြစ်၏။
ထိုအချိန်တွင် သူမက သူမ၏ဖခင်ကိုပြောကာ ချင်မင်းဆက်မှ မင်းသားတစ်ပါးကို လက်ထပ်ခွင့် တောင်းခံခဲ့သည်။ မိသားစုက ကန့်ကွက်ခဲ့၏။ သို့ရာတွင် အဆုံးတွင် သူမ၏ ပြင်းပြသောစိတ်ဆန္ဒကြောင့် အောင်မြင်ခဲ့၏။ ထို့ကြောင့် ယဲ့မိသားစု၏ ကောင်းချီးများဖြင့် ယဲ့ကျန်း၏ တင်တောင်းပစ္စည်းများနှင့် ကမ်းလှမ်းမှုများကို ဧကရာဇ်လေးက လူတစ်ယောက်ကိုသာ လွှတ်ကာ သူ၏ဝမ်ဖေးကို ခေါ်သွားခဲ့၏။ သူတို့နှစ်ယောက် ထိုသို့လက်ထပ်ခဲ့ကြသည်။
ထိုအချက်မှလွဲပြီး ယဲ့ကျန်းက သူမကိုယ်သူမ ထုတ်ပြောရန် အခွင့်မရခဲ့ပေ။ သူမက လွန်ခဲ့သော ခြောက်လခန့်က သူ့ကို ကယ်ခဲ့သောသူဖြစ်ကြောင်းပြောရန် အခွင့်အရေးပင် မရခဲ့ပေ။
သူတို့ လက်ထပ်ပြီး နှစ်နှစ်ကြာသွားသည်အထိ သူတို့ မင်္ဂလာပွဲနေ့က တစ်ကြိမ်သာ ဆုံခဲ့ရ၏။ မော့ရုန်ကျန်းက သူမကို ကြည့်ပင်မကြည့်ချင်ကြောင်း သူမ မှတ်မိနေသေးသည်။
သူတို့၏လက်ထပ်ပွဲညတွင် သူက ရောက်လာခဲ့သော်လည်း သူမ၏မိသားစုကို ဆိုးရွားသော စကားများကိုသာ ပြောပြီး ထွက်သွားခဲ့၏။
ယဲ့ကျန်း သူမ၏မှတ်ဉာဏ်မှ နိုးထလာခဲ့သည်။ ခြောက်ကပ်နေသောရေတွင်းကို ကြည့်ပြီးနောက် သူမ၏မျက်နှာက ပျက်ယွင်းနေခဲ့၏။ ယခု သူမ အတိတ်ကို ပြန်လည်အောက်မေ့မိသွားသည်။ ထိုအချိန်က အပြစ်ကင်းစင်သောကလေးမက သူစိမ်းတစ်ယောက်ကဲ့သို့ ဖြစ်သွားပြီး သူမနှင့်သက်ဆိုင်ခြင်းပင် မရှိတော့ပေ။
သူမ သူ့ကို အမှန်တကယ် လက်ထပ်ချင်ခဲ့၏။ သူမက အဲဒီအချိန်တုန်းက သူနှင့်ဆုံခဲ့သော ကလေးမလေးဖြစ်ကြောင်း ပြောလိုခဲ့သည်။ သို့သော် သူမ မသိခင်မှာပင် သူက စစ်တိုက် ထွက်သွားခဲ့ချေပြီ။ ထို့ကြောင့် သူမ သူ့ကိုပြောရန် အခွင့်အရေးမရခဲ့ပေ။ နှစ်နှစ်မတိုင်ခင် သူ ပြန်လာခဲ့သေးသော်လည်း သူမအား လာမတွေ့ခဲ့ပေ။
ယခင်က သူမက အရမ်းကို ရူးသွပ်လွန်းခဲ့ပြီး သူ ထီးနန်းတက်သွားချိန်တွင်ပင် သူမကိုလာခေါ်ရန် ရထားလုံးကို စောင့်ဆိုင်းခဲ့၏။ သို့သော် ဘယ်တော့မှ ရောက်မလာခဲ့ပေ။ ထို့အစားအဆိပ်သေရည်ကိုသာ ရခဲ့၏။
အတိတ်က သူမသည် မည်မျှရူးသွပ်ခဲ့ကြောင်း ပြန်တွေးမိသည်။ သူမ အမှန်ပင် သူနှင့်အတူ အရွယ်ရောက်လိုခဲ့၏။ သူမ၏မျက်နှာတွင် ခါးသီးသောအပြုံးက ပေါ်လာသည်။
သစ်တောထဲတွင် သူမ တစ်ယောက်တည်းသာ ရှိနေခြင်းဖြစ်ကြောင်း အတည်ပြုလိုက်ပြီးနောက်တွင် ယဲ့ကျန်းက ခြောက်ကပ်သောရေတွင်း၏ ဘေးနားတွင်ရှိသော သစ်ပင်ကြီးအနားသို့ လျှောက်သွားလိုက်သည်။
သူမ ပြင်းပြင်းထန်ထန် နေမကောင်းဖြစ်ပြီး ပြန်သက်သာလာသောအခါ သည်တောအုပ်ထဲသို့ လာခဲ့သည်။ သူ သေချာပေါက်ပြန်လာမည်ဟုလည်း သူမ နားလည်နေ၏။ ထို့ကြောင့် သူမကိုယ်တိုင် လုပ်ထားသော ပိုက်ဆံအိတ်နှင့်အတူ သေတ္တာတစ်ခုကို သည်သစ်ပင်အောက်တွင် မြှုပ်ခဲ့သည်။ သူကသာ မြင်မည်ဆိုလျှင် သေချာပေါက် သူမ ဘယ်သူမှန်း သိပေလိမ့်မည်။
သို့သော် သူက သူမ ပေးထားခဲ့သော လျှို့ဝှက်စာသားကို မမှတ်မိလျှင်ပင် ထိုသေတ္တာကို ရှာတွေ့ရုံမျှဖြင့် အရာအားလုံးကို သိသွားပေလိမ့်မည်။ ယဲ့ကျန်းက မှတ်ဉာဏ်ထဲကအတိုင်း အနက်ရောင်သစ်သားသေတ္တာကို တူးထုတ်လိုက်သည်။ ပိုက်ဆံအိတ်က သည်အတိုင်းရှိနေသေး၏။
ပိုက်ဆံအိတ်က ခမ်းနားခြင်းမရှိပေ။ သို့ရာတွင် ပထမဆုံးအကြိမ်အဖြစ် သူမကိုယ်တိုင် လုပ်ထားခဲ့ခြင်းဖြစ်သည်။ အထူးသဖြင့် အခြားတစ်ယောက်အတွက် ရည်ရွယ်ပြီး လုပ်ခဲ့ခြင်းလည်းဖြစ်၏။ သူမ ဒါကို သူမ၏ဖခင်နှင့် အစ်ကိုအစား မော့ရုန်ကျန်းကိုသာ ပထမဦးစွာပေးခဲ့သည်။
ယောင်ယောင်ရဲ့နာမည်အရင်က ယဲ့ကျန်းပါ၊ သားတစ်ယောက်က မိသားစုကိုပြန်ရမှာပေါ့။
ထိုစာသားများကို ထိုအဝတ်အောက်တွင် ကလေးဆန်ဆန် ရေးထိုးထားသည်။ သူမ မျက်မှောင်ကြုတ်မိ၏။ သူမ သည်စာသားလေးနှင့်အတူ သူ လုံခြုံစွာပြန်ရောက်လာရန် မျှော်လင့်ခဲ့သေးသည်။
သူမ၏ ကြောက်မက်ဖွယ်ကောင်းသော အားထုတ်မှုများက သည်လိုအခြေအနေကို ဖြစ်လာစေခဲ့သည်။ မော့ရုန်ကျန်းက လု၀ူရှန်းကိုသာ အသိအမှတ်ပြုခဲ့၏။
ယဲ့ကျန်းသည် သူမ၏ဆံထုံးမှ ဆံထိုးကိုထုတ်လိုက်သည်။ ပိုက်ဆံအိတ်မှ အပ်ချည်မျှင်များကို ဆွဲထုတ်ပြီးနောက် သူမ၏လက်များက ထိန်းချုပ်၍ မရနိုင်လောက်အောင် တုန်ယင်လာခဲ့၏။
သည်ပိုက်ဆံအိတ်က နှစ်များစွာကြာခဲ့လေပြီ။ သူမ အသက် ၇ နှစ်ကတည်းက လုပ်ထားခဲ့ခြင်းဖြစ်၏။ ထို့ကြောင့် အပ်ချည်မျှင်များက လျော့ရဲလာခဲ့လေပြီ။ တဖြည်းဖြည်းချင်း သူမ အိတ်ကို ဖွင့်လိုက်၏။ ထိုအိတ်ထဲတွင် သူမ၏ အတိတ်နှင့်ချစ်ခြင်းတရားများပါသည်။ ယဲ့ကျန်းက သူမ၏ ချစ်ခြင်းတရားများအတိုင်း သေသွားခဲ့လေပြီ။
သည်ပိုက်ဆံအိတ်ကို မဖျက်ဆီးနိုင်သမျှ ကာလပတ်လုံး သူမ စိတ်အေးနိုင်မည် မဟုတ်ပေ။ ဖျက်ဆီးပြီးနောက်တွင် ယဲ့ကျန်းက သည်သေတ္တာကို ရေတွင်းထဲသို့ ပစ်ချလိုက်၏။ ရေတွင်းထဲတွင် အချိန်ကြာသည့်အခါ လူတိုင်းက ဒါကို မေ့သွားပေလိမ့်မည်။ နောက်ဆုံးတွင် မော့ရုန်ကျန်းနှင့် သူမ၏နောက်ဆုံးကြိုးထုံးက ပြေသွားခဲ့လေပြီ။
ခံစားချက်ကောင်းလိုက်တာ။
ယဲ့ကျန်းက ကျေနပ်သောမျက်နှာထားဖြင့် တောအုပ်ထဲမှ ထွက်သွားသည်။ သူမ၏ပါးပေါ် ကျလာသောမျက်ရည်များက ရပ်တန့်ခြင်းမရှိတော့ပေ။
သိပ်မကြာခင်မှာပင် မြင့်မားသောအရပ်အမောင်း၊ ဂုဏ်ယူဖွယ်ကောင်းသော ရုပ်ရည်၊ ခန္ဓာကိုယ်အချိုးအစားတို့ဖြင့် လူတစ်ယောက်က ရေတွင်းအနားသို့ရောက်လာ၏။ သူ၏အကြည့်များက သစ်ပင်အောက်တွင်ရှိသော တူးထုတ်ခံလိုက်ရသည့် အပေါက်ထံသို့ ရောက်သွားသည်။
...
