Unicode
အပိုင်း(၄၄) တွန့်ဆုတ်မှု (၂)
သူမက တွန်ဆုတ်နေသော်လည်း ယဲ့ကျန်း အနေဖြင့် ငြင်းဆန်၍ မရဘဲ လုလင်ကျစ်ထံသို့ သူမ၏ အမျိုးမျိုးသော ဆေးများကို ယူလျက် သွားတွေ့ရသည်။ သူမက အရှေ့ခြံဝန်းသို့ ရောက်သွားသောအခါ ဝင်ရန် တုံ့ဆိုင်းသွားပြန်၏။ သူမက လက်ရှိအချိန်တွင် အလွန် ဖိအား များနေကာ စိတ်ထဲတွင်လည်း သဘောမကျမှုက ပြည့်နှက်နေခဲ့သည်။ သူမက သူ၏ ဒဏ်ရာကို သက်သာအောင် မလုပ်ပေးချင်ပေ။
အား
လုလင်ကျစ်တွင် သူ့အတွက် ဆေးများ ပြင်ဆင် ပေးနေသော အစေခံ တစ်ယောက် ရှိသည်။ သူမက လုယောင်ယောင်ကို အပြင်ဘက်တွင် မြင်သောအခါ ခပ်မြန်မြန်ပင် သူမ၏ သခင်ကို အကြောင်းကြား၏။
"တတိယ သခင်မလေး အပြင်မှာ ရောက်နေပါတယ်"
ယဲ့ကျန်း သူ့ထံ လာတွေ့ကြောင်း ကြားရသောအခါ သူ၏ ရင်ထဲတွင် ပျော်ရွှင်မှုက မြင့်တက် လာသည်။ သူက ကိုယ်တိုင် ကိုယ်ကျပင် ထွက်ကြည့်သောအခါ ခြံဝန်း အပြင်ဘက်တွင် ရပ်နေသော စိတ်လေလွင့် နေပုံရသည့် ယဲ့ကျန်းကို မြင်ရသည်။ သူ ကျေနပ်သွားရ၏။
" တတိယညီမက ဒီနေရာကို ရောက်နေမှ အထဲကို ဘာလို့ မဝင်လာတာလဲ"
ယဲ့ကျန်းက သူ့ကို တစ်ချက် ကြည့်ပြီးနောက် သူမ၏ အကြည့်က သူမ ယူလာသော ခြင်းတောင်းထံသို့ ရောက်သွားသည်။
"ဒါက ဆေးတွေပဲ၊ ယူလာပေးတာပါ"
"ကောင်းပြီ၊ အထဲ ဝင်လာပြီးတော့ ဒဏ်ရာကို ပတ်တီး စည်းပေးလေ"
သူ၏ ဒဏ်ရာက ပြင်းထန်ခြင်း မရှိပေ။ အင်ပါယာ နောက်သို့ နှစ်ပေါင်းများစွာ လိုက်ပြီး နောက်တွင် အမျိုးမျိုးသော ပြင်းထန်လွန်းသည့် ဒဏ်ရာများကို ခံစားရခဲ့ပြီးလေပြီ။ အနည်းငယ် ဆေးထည့် ပတ်တီးစည်းလိုက်ရုံမျှဖြင့် သူ၏ ဒဏ်ရာက အချိန်တစ်ခုအကြာတွင် ပျောက်သွားပေလိမ့်မည်။ လက်ရှိအခါတွင် ထိုကလေးမလေးက တွန့်ဆုတ်စွာနှင့် ဆေးများထည့်ပေးမည့် အနေအထားကို သူ စောင့်ကြည့်ချင်သွားသည်။
ယဲ့ကျန်းက မျက်မှောင် ကြုတ်ပြီး ပြောသည်။
"အစေခံ ရှိတာပဲ မဟုတ်ဘူးလား၊ သူ့ကိုပဲ လုပ်ခိုင်းလိုက်ပါလား။ ကျွန်မ မလုပ်ဘူး"
လုလင်ကျစ်က သူမကို သဘောတကျ ကြည့်ပြီး ပြောသည်။
"တတိယ ညီမက ငယ်ငယ်ကတည်းက ဆေးပင်များကို လေ့လာခဲ့တာ မဟုတ်ဘူးလား၊ ဆေးဝါး အကယ်ဒမီ ကျောင်းတော်ကိုတောင် တက်ချင် သေးတာဆို၊ လုံလောက်တဲ့ လေ့ကျင့်မှု မရှိဘဲ ဖြစ်ပါ့မလား"
ယဲ့ကျန်းက နှာခေါင်း ရှုံ့ကာ သူမ ထွက်သွားရန် ဆုံးဖြတ်လိုက်၏။ သူမ နောက်လှည့်ပြီး နောက်တွင် လုရှီမင်နှင့် လုရှန်းကျစ်တို့ သားအဖ နှစ်ယောက် ချဉ်းကပ်လာနေ၍ အဝေးမှ လက်ပြ နေခြင်းကို မြင်လိုက်ရသည်။ ချက်ချင်းလိုလိုပင် ယဲ့ကျန်းက မျက်မှောင် ကြုတ်လိုက် မိတော့သည်။
"ယောင်ယောင် မင်းရဲ့ အစ်ကိုကြီးကို ဆေးလာ ပေးတာလား"
လုရှန်းကျစ်က ထိုနှစ်ယောက်၏ အခြေအနေကို မြင်လိုက်ရုံမျှဖြင့် သူ နားလည်နေသည်။ ထို့ကြောင့် ချက်ချင်းပင် ရှေ့တက်လာပြီး ပြောလိုက်၏။
သူတို့ ရောက်လာသည်နှင့် လုရှီမင်က ယဲ့ကျန်း၏ နှဖူးကို တစ်ချက် ခေါက်သည်။
"မင်းက မင်းရဲ့ အစ်ကိုကြီးကို ဒဏ်ရာ ရအောင် လုပ်လိုက်ပြီ၊ အခုကစပြီး အမဲ မလိုက်ရတော့ဘူး"
"တတိယ ဦးလေး ယောင်ယောင်က တမင် လုပ်တာ မဟုတ်ပါဘူး၊ ပြောရမယ်ဆိုရင် ဒီနေရာကို ရောက်နေပြီပဲ။ အခု ဆေးလာပေးရင်း တောင်းပန်နေတာပါ"
လုလင်ကျစ်က ယဲ့ကျန်းအစား ခုခံပြောဆို ပေးသည်။
လုရှန်းကျစ်က လုလင်ကျစ်၏ လက်မောင်းကို ကြည့်ပြီးနောက် ဒဏ်ရာကို သေချာ ပတ်တီး ထပ်စည်းထားခြင်း မရှိကြောင်း သတိထားမိပြီး ပြောသည်။
"ကောင်းပြီ ကြည့်ရတာ ယောင်ယောင်က ပတ်တီး ထပ်မစည်း ပေးရသေးတဲ့ပုံပဲ"
ယဲ့ကျန်း ဆက်၍ ငြင်းမနေတော့ပေ။ သူမက ဆန္ဒ မရှိသော်လည်း လုလင်ကျစ် နောက်မှ လိုက်ပြီး သူ၏ အဆောင်ခန်း အတွင်းသို့ ဝင်လိုက်ရသည်။ အနောက်မှ လုရှီမင်နှင့် လုရှန်းကျစ်တို့ကလည်း လိုက်လာကြ၏။
...
