Unicode
အပိုင်း (၆၂) အရူးလိုချစ်သူ (၁)
ဖေးရှီက အဓိကအိမ်တော်နှင့်အနီးဆုံး အနည်းငယ်နိမ့်ကျသော ခြံဝန်းထဲတွင် နေသည်။ ယဲ့ကျန်း ရောက်သွားသောအခါ ဖေးရှီက အတွင်းခန်းအဆောင်ထဲသို့ ဝင်ရောက်သွားသဖြင့် သခင်မလေးက စောင့်ဆိုင်းနေရသည်။ တစ်ခဏခန့်ကြာပြီးနောက် တတိယသခင်မက ပြန်မလာသေးပေ။ ယဲ့ကျန်း၏နှုတ်ခမ်းများက အနည်းငယ် မဲ့ကျသွား၏။ သူမ ပြန်သင့်မပြန်သင့် စဉ်းစားနေရလေပြီ။
သူမ ဆုံးဖြတ်ချက်ချနေချိန်တွင် အလွန်လှပသောဝတ်စုံကို ဝတ်ဆင်ထားသော အမျိုးသမီးတစ်ယောက်က အရှေ့ဘက်အခန်းထဲမှ ထွက်လာပြီး သူမ၏အာရုံကို ဆွဲဆောင်သွားကာ သူမ၏ အတွေးများမှ ရုန်းထွက်သွားစေ၏။ တစ်ချက်ကြည့်ရုံဖြင့်ပင် ထိုအမျိုးသမီး၏ ဆံပင်နှင်ဝတ်စုံအရ ထိုအမျိုးသမီးက အစေခံမဟုတ်မှန်း သိလိုက်သည်။ ထို့အပြင် ထိုအမျိုးသမီးက သူမ ယဲ့စံအိမ်တွင် မြင်ခဲ့ဖူးနေကြ အချို့သော သခင်မများကိုပင် သတိရသွားစေခဲ့မိသည်။
သူမကိုမြင်သောအခါ ထိုအမျိုးသမီး၏နှုတ်ခမ်းတွင် လျှို့ဝှက်ဆန်းကြယ်သော အပြုံးက ဖြစ်တည်လာသည်။ သူမဘက်သို့လှည့်ကာ လျှောက်လာပြီး အနည်းငယ် ရိုကျိုးဟန်ဖြင့် တစ်ချက် ဦးညွတ်ပြ၏။
“တတိယသခင်မလေး မဟုတ်လား”
သူမက လေသံကို အနည်းငယ်မြှင့်ထားသည်။ အပြုံးကလည်း တောက်ပသွားကာ သူမကို စူးစိုက်ကြည့်ပြီးမှသာပြန်လှည့်၏။
“တတိယသခင်မ အပြင်သွားတယ်၊ တတိယသခင်မလေး သခင်မရဲ့စံအိမ်ထဲမှာ စောင့်ဆိုင်းနေတာ ကောင်းမယ်ထင်တယ်၊ မင်းရဲ့အမေက သိပ်မကြာခင်မှာ ပြန်လာမှာပါ”
သူမက ပြောသည်။
ယဲ့ကျန်းက မျက်မှောင်ကိုကြုတ်လိုက်ကာ သူမညီမ၏မှတ်ဉာဏ်ထဲတွင် ထိုအမျိုးသမီး မရှိကြောင်း သတိရမိသည်။ သူမက မြို့တော်မှဖြစ်လောက်၏။ သူမက အစေခံ မဟုတ်ပေ။
ဒါဆို ဘယ်သူလဲ၊ ဖေးရှီနဲ့ ဘယ်လိုပတ်သက်လဲ။
အခြားသူတိုင်း၏ကိစ္စတွင် ဝင်မပါသင့်ကြောင်း သူမကိုယ်သူမ ပြောနေပြီးနောက်တွင် ယဲ့ကျန်းက မသိလိုက်မသိဘာသာ ခေါင်းညိတ်ပြီးနောက် ထွက်သွားရန် ပြင်ဆင်လိုက်သည်။
“ကောင်းပြီ၊ ကျေးဇူးပါပဲ”
သူမ ခြေတစ်လှမ်းလှမ်းပြီးသည်နှင့် ဖေးရှီ၏အစေခံဟိုင်ထန်းက အတွင်းခန်းထဲသို့ ဝင်လာခဲ့ပြီး သူမကို ထိုအမျိုးသမီးနှင့် မြင်လိုက်သည်နှင့် ရပ်တန့်သွားသည်။ တစ်ခဏခန့်သာ တန့်သွားခဲ့ခြင်းမျိုးဖြစ်ကာ ချက်ချင်းဆိုသလိုပင် အမူအရာက ပြန်ပြောင်းသွားပြီး ယဲ့ကျန်းကို ဦးညွတ်ဂါဝရပြုလာကာပြော၏။
“တတိယသခင်မလေးကို ဂါဝရပြုပါတယ်”
သူမ၏ ရုတ်တရက် ပြုံးလိုက်သောအနေအထားမျိုးကို မြင်သောအခါ ယဲ့ကျန်းကလည်း အခြေအနေကို မြန်မြန်ဆန်ဆန် မေးလိုက်သည်။ သူမ၏အသံက ချိုမြိန်ကာ အပြစ်ကင်းစင်၏။
“အစ်မဟိုင်ထန်း တို့ အမေ့ကို လာရှာတာ၊ ဘာလို့ ဒီမှာမရှိတာလဲ”
ဟိုင်ထန်းက ထိုမေးခွန်းကြောင့် တောင့်တင်းသွားပြီးနောက် ထူးဆန်းသော အမျိုးသမီးကို အေးစက်စွာ စိုက်ကြည့်ပြီးမှသာလျှင် ယဲ့ကျန်းကိုပြန်ကြည့်သည်။
“သခင်မက အတွင်းဆောင်ကိုသွားပါတယ်၊ အချိန်တိုအတွင်းမှာ ပြန်လာမှာပါ”
ယဲ့ကျန်းက ထိုအနီးကပ်အစေခံ၏တုံ့ပြန်မှုကို အာရုံစိုက်နေခဲ့ခြင်းမရှိလျှင် အချို့သောအမူအရာ ပြောင်းလဲမှုများကို လက်လွှတ်လိုက်ရပေလိမ့်မည်။
ထိုအမျိုးသမီးက ဟိုင်ထန်းနှင့်သူမကို ကြည့်မနေပေ။ သူမက ယဲ့ကျန်း၏ လက်မောင်းများကိုဖက်ရန် ရှေ့တိုးလာခဲ့၏။
“တတိယသခင်မလေး တတိယသခင်မကို ခြံဝန်းထဲမှာ စောင့်ဆိုင်းလိုက်ပါလား၊ တို့လည်း သူနဲ့အတူ နေပေးလိုက်မယ်”
ထိုအမျိုးသမီးက ပြောသည်။ သူမ၏မျက်နှာရှိအပြုံးက ပို၍တောက်ပလာကာ ယဲ့ကျန်းကို ဖေးရှီအခန်းအတွင်းသို့ခေါ်သည်။
ဘယ်လောက် ထူးဆန်းလိုက်သလဲ။
ထိုအခိုက် ဟိုင်ထန်းက ရှေ့တက်လာပြီး ထိုအမျိုးသမီး၏ အထဲသို့ဝင်ရန် ပြင်ဆင်နေခြင်းကို တားလိုက်ကာ ယဲ့ကျန်းကို ကိုင်ထားသော လက်များကို ဆွဲဖယ်ပြီး အေးစက်သော မျက်ဝန်းများဖြင့် ကြည့်သည်။
“သခင်မက ဒီအခန်းထဲကို ကျွန်မနဲ့ တတိယသခင်မလေးကလွဲပြီး ဘယ်အစေခံကိုမှ ဝင်ခွင့်မပြုထားပါဘူး၊ အစ်မကြီးရွှယ်လျှို ကျေးဇူးပြုပြီး ဝင်ခွင့်မပြုတာကို စိတ်မရှိပါနဲ့၊ အထဲကို ဝင်ခွင့်မရှိပါဘူး၊ ဒါကြောင့် ကျွန်မကပဲ တတိယသခင်မလေးကို အဖော်ပြုပေးလိုက်ပါ့မယ်၊ ကျွန်မတို့ ရှင့်ကို ဆွဲထားမနေတော့ပါဘူး”
ရွှယ်လျှို၏မျက်နှာက ပျက်သွားသည်။
“နင်”
“တတိယသခင်မလေး ကျေးဇူးပြုပြီး ဝင်လာခဲ့ပါ”
ဟိုင်ထန်းက ပြောသည်။ သူမ၏အသံက တောင့်တင်းနေ၏။ သူမက ရွှယ်လျှိုကို ရင်ဆိုင်ရန် ပင်ပန်းနေခဲ့ချေပြီ။
သည်လိုဖိတ်ကြားခံရသောအခါ ယဲ့ကျန်းက ခေါင်းညိတ်ပြီးနောက် သူမရှေ့ရှိ မြင်ကွင်းကို သတိမထားမိသကဲ့သို့ ပြောလိုက်သည်။
“ဒါဆိုလည်းသွားရအောင် အမေ့ကို စောင့်ကြတာပေါ့ အစ်မကြီးဟိုင်ထန်း”
သူမ၏နှုတ်ခမ်းများက တည်ငြိမ်သွားသည်။ ယဲ့ကျန်းက အသာအယာပင် ဟိုင်ထန်း၏အနောက်မှ လိုက်ကာ အခန်းတွင်းသို့ဝင်လာ၏။
သူမ၏စိတ်ကမူ သည်ပြောင်းလဲမှုအပေါ် ရှိနေခဲ့သည်။ ဟိုင်ထန်းက လိုက်ကာစကို လျင်မြန်စွာ ချလိုက်၏။ ထိုအမျိုးသမီးကို တစ်ချက်ပင် မကြည့်ချင်တော့ဟန်ဖြင့် အထဲသို့ ဆက်ဝင်သွားသောအခါ ရွှယ်လျှိုက ဒေါသတကြီး ကျနမရစ်တော့၏။
ဖေးရှီ၏ယုံကြည်ရသောအစေခံနှင့် ထိုအမျိုးသမီး၏ ဆက်ဆံပုံကို ကြည့်ပြီးနောက် ယဲ့ကျန်းက ရွှယ်လျှိုက သည်နေရာသို့ ကောင်းသောရည်ရွယ်ချက်ဖြင့် ရောက်လာခြင်းမဟုတ်ကြောင်း သိလိုက်ရသည်။
ထိုင်ပြီးနောက်တွင် တတိယသခင်မလေးက သည်အနီးကပ်အစေခံကို ကြည့်လိုက်သည်။ ထို့နောက် အကြည့်လွှဲကာနှုတ်ခမ်းများကို ကော့တက်သွားစေ၏။
“အစ်မကြီးဟိုင်ထန်း သူက ဘယ်သူလဲ၊ ဘာလို့ ကျွန်မ တစ်ခါမှ မမြင်ဖူးတာလဲ”
...
